مالیگاؤں: تین شکاری گرفتار، ہرن کا گوشت برآمد

مالیگاؤں میں مقامی محکمہ فاریسٹ کے اہلکاروں نے گزشتہ روز ہرن کے گوشت سمیت ایک موٹر سائیکل اور تین نوجوانوں کو گرفتار کیا ہے۔

ریاست مہاراشٹر کے شہر مالیگاؤں میں مقامی محکمہ فاریسٹ کے آفیسر وکاس کامبلے نے بتایا کہ خفیہ معلومات کی بنیاد پر درے گاؤں گٹ نمبر 68 کے علاقے میں کچھ نوجوان ہرن کا گوشت فروخت کی غرض سے پلاسٹک کے تھیلوں میں رکھ کر لائے ہوئے ہیں۔

اس معاملے کی اطلاع ملتے ہی پولیس اور محکمہ فاریسٹ نے مشترکہ طور پر چھاپہ مار کارروائی کرتے ہوئے تین نوجوانوں کو ہرن کے گوشت کے ساتھ گرفتار کرلیا ہے۔

واضح رہے کہ گرفتار شدگان میں شیخ شبیر شیخ رزاق عرف اعلی (ساکن کمالپورہ)، سید مبین سید ہارون (ساکن کمالپورہ) اور محمد مدثر عقیل احمد شامل ہیں۔

اطلاعات کے مطابق محکمہ فاریسٹ نے تینوں افراد کے قبضے سے 25 کلو ہرن کا گوشت ایک موٹر سائیکل اور ایک کلہاڑی برآمد کی ہے۔اور ان پر ایکٹ 1972 کی دفعہ 9/39/38 کے تحت مقدمہ درج کرکے پولیس تحویل میں روانہ کیا گیا۔