ممبئی: اجیت پوار کے مہاراشٹر میں ایکناتھ شندے کی زیرقیادت حکومت میں شامل ہونے کے بعد ان کے اور شرد پوار کے درمیان نیشنلسٹ کانگریس پارٹی (این سی پی) پر دعویداری کی لڑائی تیز ہوگئی ہے، اس سلسلے میں بدھ کو دونوں خیموں نے الگ الگ میٹنگ طلب کی ہے۔ وزیر اعظم نریندر مودی کی قیادت کی تعریف کرتے ہوئے اجیت پوار نے منگل کو کہا کہ ان کے لیے کوئی متبادل نہیں ہے۔
این سی پی کے شرد پوار خیمہ نے بدھ کو دوپہر ایک بجے جنوبی ممبئی کے یشونت راؤ چوان سینٹر میں پارٹی کی میٹنگ بلائی ہے، جب کہ اجیت پوار نے صبح گیارہ بجے مضافاتی باندرہ میں ممبئی ایجوکیشن ٹرسٹ کے احاطے میں میٹنگ طلب کی ہے۔ دونوں خیموں کی ملاقات سے صورتحال واضح ہونے کی امید ہے کہ کتنے اراکین اسمبلی کس کے ساتھ ہیں۔ این سی پی کے 288 رکنی مہاراشٹرا اسمبلی میں 53 ایم ایل اے ہیں اور اجیت پوار کے دھڑے کو انحراف مخالف قانون کے تحت نااہلی سے بچنے کے لیے کم از کم 36 ایم ایل ایز کی حمایت کی ضرورت ہے۔
اجیت پوار کے خیمہ نے 40 ایم ایل ایز کی حمایت کا دعویٰ کیا ہے۔ اس کے ساتھ ہی شرد پوار کے خیمہ نے دعویٰ کیا ہے کہ حکومت میں شامل اجیت پوار سمیت صرف نو ایم ایل ایز نے اپنا رخ بدل لیا ہے اور باقی شرد پوار کے ساتھ ہیں۔ ایم ایل اے سروج اہیرے، پراجکتا تانپورے اور سنیل بھوسارا کے بارے میں کہا جاتا ہے کہ وہ اجیت پوار کے ساتھ ہیں، انہوں نے شرد پوار سے ملاقات کی اور ان سے اپنی وفاداری کا اظہار کیا۔
مزید پڑھیں:۔Sharad Pawar Warns Ajit Pawar میری تصویر بغیر اجازت استعمال نہ کریں، شرد پوار کی اجیت پوار کو وارننگ
دریں اثنا مہاراشٹر کے نائب وزیر اعلی کے طور پر حلف لینے کے دو دن بعد اجیت پوار نے منگل کو کہا کہ وزیر اعظم نریندر مودی جیسا کوئی لیڈر نہیں ہے۔ اجیت پوار نے جنوبی ممبئی میں نیشنلسٹ کانگریس پارٹی (این سی پی) کے اپنے خیمہ کے نئے دفتر کا افتتاح کیا۔ اس موقع پر صحافیوں سے بات کرتے ہوئے انہوں نے کہا کہ ملک ان کی (مودی) کی قیادت میں آگے بڑھ رہا ہے۔ ہم ان کی حمایت کے لیے حکومت میں شامل ہوئے ہیں۔ انہوں نے کہا کہ مودی جیسا کوئی لیڈر نہیں ہے۔ ان کے پاس کوئی آپشن نہیں ہے۔
