لاک ڈاؤن پر مہاراشٹر حکومت چند دنوں میں لے سکتی ہے فیصلہ

نائب وزیر اعلی نے کہا کہ 'اس وقت ہم متعلقہ محکموں سے بات کر رہے اور پوری صورتحال پر نظر رکھے ہوئے ہیں۔ آٹھ یا دس دنوں تک صورتحال کا جائزہ لیں گے اور اس کے بعد لاک ڈاؤن نافذ کرنے کا فیصلہ کیا جائے گا۔'

مہاراشٹر میں ہفتہ کے روز کورونا کے 5،760 نئے مریض سامنے آئے ہیں۔ اسے دیکھتے ہوئے خدشہ ظاہر کیا جارہا ہے کہ مہاراشٹر حکومت کورونا پر مکمل کنٹرول کرنے کے لئے کچھ دن کے لئے ایک بار پھر لاک ڈاؤن کا اعلان کر سکتی ہے تاہم ریاست کے نائب وزیر اعلی اجیت پوار نے اب اس طرح کے کسی امکان کو مسترد کردیا ہے۔

نائب وزیر اعلی اجیت پوار کا کہنا ہے کہ 'دیوالی کے دوران صوبہ مہاراشٹر میں بہت بڑا ہجوم دیکھنے کو ملا، جبکہ گنیش چتروتی کے دوران بھی ایسا ہی ہجوم دیکھا گیا تھا۔'

انہوں نے کہا کہ 'اس وقت ہم متعلقہ محکموں سے بات کر رہے اور پوری صورتحال پر نظر رکھے ہوئے ہیں۔ آٹھ یا دس دنوں تک صورتحال کا جائزہ لیں گے اور اس کے بعد لاک ڈاؤن نافذ کرنے کا فیصلہ کیا جائے گا۔'

واضح رہے کہ ہفتہ کے روز مہاراشٹر میں کورونا مریضوں کی تعداد بڑھ کر 17،74،455 ہو گئی ہے۔ ریاست میں مرنے والوں کی کل تعداد 46،573 ہوگئی ہے۔ وہیں اب تک 16،47،004 کوویڈ 19 مریض ٹھیک ہو چکے ہیں۔ اس وقت تقریبا 80 ہزار مریض زیر علاج ہیں۔

وہیں دوسری جانب مہاراشٹرا حکومت کورونا وائرس کے واقعات میں اضافے کے پیش نظر دارالحکومت دہلی آنے اور جانے والی ٹرینوں اور ایئر لائنوں کو ملتوی کرنے پر غور کر رہی ہے۔

پرنسپل سکریٹری سنجے کمار نے کہا کہ 'ریاست میں وائرس کو پھیلنے سے روکنے کے لئے مختلف اقدامات زیر بحث ہیں اور دہلی سے ٹرینوں اور ہوائی جہازوں کی آمد و رفت معطل کرنا ان میں سے ایک ہے۔ لیکن ابھی تک کوئی فیصلہ نہیں لیا گیا ہے۔'