ارنب کی گرفتاری پر جے پی نڈا نے کیا کہا؟

ری پبلک ٹی کے سینیئر صحافی ارنب گوسوامی کو ممبئی پولیس کے ذریعے گرفتار کئے جانے پر بھارتیہ جنتا پارٹی کے قومی صدر جگت پرکاش نڈا نے کہا کہ 'ارنب کی گرفتاری صحافت کا سیاہ دن ہے۔

بی جے پی صدر جے پی نڈا بہار کے دارالحکومت پٹنہ میں انتخابی سرگرمیوں میں حصہ لینے پہنچے تھے، پٹنہ ایئر پورٹ پر انہوں نے میڈیا سے بات کرتے ہوئے کہا کہ 'ایک صحافی کو گرفتار کرنا انتہائی افسوسناک بات ہے اور آج کا دن صحافت کے لیے کافی برا دن ہے۔

نڈا نے کہا کہ ایمرجنسی کے بعد سے آج تک کانگریس نے جو بھی کام کیا ہے وہ یقیناً قابل مذمت ہے اور اس بار ہم صحافیوں پر حملے کی پرزور مذمت کرتے ہیں۔

انہوں نے کہا کہ 'یہ کانگریس کا طریقہ بن گیا ہے کہ جو بھی فیصلہ اس کے خلاف آتا ہے وہ اس کی مخالفت کرنے اتر جاتی ہے اور یہی وجہ ہے کہ مہاراشٹر میں ایک صحافی کے ساتھ کانگریس نے ایسا کرنا شروع کیا ہے کیوں کہ صحافی کانگریس کی ناکامیوں کو اجاگر کرتا ہے۔

جے پی نڈا نے کہا کہ 'مہاراشٹر حکومت کے اس رویہ کا عوام جواب دے گی۔