چھ جنوری مہاراشٹر جرنلزم ڈے (درپن ڈے) کے موقع پر ناسک پولیس کی جانب سے مالیگاؤں سٹی پولیس اسٹیشن میں واقع سنسواد ہال میں ایڈیشنل اے ایس پی چندر کانت کھنڈوی کی سربراہی میں شہر کی الیکٹرانک و پرنٹ میڈیا کے تمام صحافیوں کے اعزاز میں ایک استقبالیہ تقریب کا انعقاد کیا گیا۔
اس سلسلے میں پولیس انتظامیہ کی جانب سے تمام صحافیوں کا پھول ہار کے ذریعے استقبال کیا گیا۔ اس موقع پر شہر کے سبھی پولیس اسٹیشن کے سینیئر پولیس اہکار بھی موجود تھے۔
اس موقع پر چندرکانت کھنڈوی نے کہا کہ چھ جنوری مراٹھی صحافت کے بانی بال شاستری جامبھیکر کے نام سے منسوب ہے۔ سنہ 1832ء میں انہوں نے پہلا مراٹھی اخبار 'درپن'شروع کیا تھا جو انگریزوں کے بعد بھارت کا پہلا اور سب سے معتبر اخبار تھا۔
انہوں نے مزید کہا کہ سنہ 1832ء کے بعد سے آج تک صحافت مسلسل عوام کی خدمت انجام دے رہی ہے۔ میڈیا کی اس خدمات کو دیکھتے ہوئے 6 جنوری مراٹھی جرنلزم ڈے کے موقع پر پولیس محکمہ کی جانب سے شہر کے تمام صحافیوں کا استقبال کیا گیا۔
الیکٹرونک میڈیا سے وابستہ صحافی 'منصور اکبر'نے اس بات پر روشنی ڈالی کہ بہت سے صحافی اپنی زندگی کو خطرے میں ڈال کر کام کرتے ہیں۔ جنگ زدہ، آفات اور وباؤں سے بری طرح متاثرہ علاقوں میں جاتے ہیں اور عوام کو حالات سے باخبر کرتے رہتے ہیں۔