چار منزلہ عمارت میں شگاف

بھیونڈی میں اس وقت ہنگامہ برپا ہوگیا جب ایک چار منزلہ عمارت میں شگاف پڑنے پڑنے لگا۔

ریاست مہاراشٹر کے دارالحکومت ممبئی سے متصل پاورلوم کے صنعتی شہر بھیونڈی میں جمعہ کے شب ہونے والے عمارت حادثے میں دو افراد ہلاک اور 6 شدید طور سے زخمی ہونے کا معاملہ ابھی سرد بھی نہیں پڑا تھا کہ بھیونڈی شہر کے خان کمپاؤنڈ مومن پورہ علاقے میں پیر کے شب تقریباً 12:30 عمارت کے ستون اور سلیب میں شگاف پڑنے سے پوری عمارت میں زبردست سراسیمگی پھیل گئی۔

دیر رات میں ہی عمارت میں رہنے والے افراد سے پوری عمارت کو خالی کرالیا گیا اورانہیں اپنے رشتہ داروں اور پڑوسیوں کے یہاں پناہ لینے کے لیے کہا گیا۔

کارپوریشن ذرائع کے مطابق بھیونڈی کے مومن پورہ علاقے میں واقع ہاوس نمبر 1032/0 ایاز مومن نامی عمارت جو 15 برس قبل تعمیر ہوئی تھی اور اس چار منزلہ عمارت میں 45 خاندان کے تقریباً 300 افراد رہائش پذیر تھے، 15 برس قبل تعمیر ہونے والی اس عمارت پر چار برس قبل چوتھی منزل تعمیر کرنے کا کام انجام دیا گیا، جس کی وجہ سے عمارت کمزور ہوگئی تھی۔

مقامی باشندوں کے مطابق گراؤنڈ فلور پر پاورلوم فیکٹری تھی، جسے چند برس قبل ہٹایا گیا ہے۔

واضح رہے کہ 26 اگست سنہ 2017 کو مخدوش عمارت کا نوٹس میونسپل کارپوریشن نے دیا تھا اور جس کے بعد مخدوش عمارت کا بھی نوٹس میونسپل انتظامیہ نے جاری کیا جس کے بعد عمارت میں رہنے والوں نے 27/4/2018 اسٹرکچرل آڈٹ کرایا کراتے ہوئے عمارت کی مرمت کا کام کرایا تھا، لیکن پیر کے شب 12:30 بجے عمارت کی ستون اور سلیپ میں شگاف پڑنے کا حادثہ پیش آیا جس کے بعد پوری عمارت میں ہنگامہ مچ گیا۔

اس اطلاع کے بعد میونسپل کارپوریشن انتظامیہ نے فوراً پہنچ کر رات میں ہی پوری عمارت کو خالی کرادیا، میونسپل افسران کی ٹیم نے پہنچ کر عمارت کو نوٹس لگاتے ہوئے عمارت میں نہ رہنے کی ہدایات جاری کی۔

واضح رہے کہ اس عمارت کا ایک بار پھر اسٹرکچرل آڈٹ کرنے کا کام شروع ہے اب اس کی رپورٹ آنے کے بعد ہی واضح ہوگا کہ عمارت میں لوگ رہ سکتے ہیں یا نہیں۔

خیال رہے کہ کچھ روز قبل بھی ممبئی میں ایک عمارت منہدم ہو گئی تھی جس میں کئی افراد ہلاک ہوگئے تھے۔