سائزنگ میں زبردست آتشزدگی

ممبئی کے پاورلوم صنعتی شہر بھیونڈی میں اچانک ایک سائزنگ میں آگ لگنے سے وہاں پر موجود تیار و خام مال سمیت دیگر اشیا جل کر خاکستر ہوگئی جبکہ کئی گھنٹے جدوجہد کے بعد فائر بریگیڈ عملے نے آگ پر قابو پالیا۔

اطلاعات کے مطابق بھیونڈی شہر کے کھوکھا کمپاؤنڈ علاقے میں سپر سائزنگ نامی کمپنی میں اچانک آگ لگ گئی اور کچھ ہی دیر میں پوری کمپنی کو اپنی زد میں لے لیا۔ یارن ہونے کے سبب آگ تیزی پھیل گئی اور پوری کمپنی آگ کے شعلوں میں تبدیل ہوگئی۔

آتشزدگی حادثہ میں پاورلوم میں استعمال ہونے والی تیار یارن کی بیم اور بیم تیار کرنے کے لئے رکھا خام مال اور کیمیکل اس آتشزدگی میں خاکستر ہوگیا۔

جمعہ کو چھٹی ہونے کے سبب کوئی مزدور موجود نہیں تھا اسی لئے کوئی جانی نقصان نہیں ہوا ہے۔

آتشزدگی کی اطلاع موصول ہوتے ہی پولیس اور فائر بریگیڈ کا عملہ موقع پر پہنچ گیا اور کئی گھنٹوں کی مشقت کے بعد آگ پر قابو پالیا گیا۔

پولیس نے اس سلسلہ میں کیس درج کرکے تحقیقات کا آغاز کردیا ہے۔