سرکاری اسپتال میں عید ملن کا پروگرام

ریاست مہاراشٹر کے ضلع اورنگ آباد کے سب سے بڑے سرکاری اسپتال میں خدمت خلق گروپ کی جانب سے عید ملن پروگرام کا اہتمام کیا گیا۔

عیدالفطر کے موقع پر جہاں ملک بھر میں لوگ خوشیاں منانے میں مصروف تھے، اس وقت اورنگ آباد شہر کے فلاحی ادارے 'کے کے گروپ'کے رضاکار گھاٹی دواخانے کے احاطے میں مریضوں اور ان کے رشتہ داروں کی شیر خورمے اور ریفریشمینٹ سے ضیافت کر رہے تھے۔

اورنگ آباد کا گھاٹی اسپتال، مراٹھواڑہ کا سب سے بڑا سرکاری اسپتال کہلاتا ہے، اس اسپتال میں بیک وقت دس ہزار سے زائد مریض زیر علاج رہتے ہیں، تقریباً آٹھ اضلاع کے غریب مریض اسی اسپتال کا رخ کرتے ہیں۔

گھاٹی دواخانے کے مریضوں کو عید کی خوشیوں میں شامل کرنے کے لیے اس برس وافر مقدار میں شیرخورمہ بنایا گیا تاکہ مریض ہو یا ان کے رشتہ دار کوئی بھی محروم نہ رہے۔

اس پروگرام میں بلا تفریق مذہب وملت سینکڑوں افراد شامل ہوتے ہیں اور عید کا تہوار مناتے ہیں۔