ریاست مہاراشٹر میں کورونا مریضوں کی تعداد میں کمی کے بعد پابندیوں میں نرمی کی گئی ہے اور آہستہ آہستہ سب چیزیں کھُل رہی ہیں لیکن فی الحال اسکولوں کو کھولنے کا فیصلہ ملتوی کر دیا گیا ہے۔
وزیراعلیٰ ادھو ٹھاکرے کے ساتھ میٹنگ میں ٹاسک فورس نے کہا کہ ریاست میں اسکول شروع کرنے کے لیے رضامندی نہیں دی جانی چاہیے کیونکہ بچوں کو ویکسین نہیں دی گئی ہے۔
ادھو ٹھاکرے نے فوری طور پر نظر ثانی شدہ اور تفصیلی آرڈیننس جاری کرنے کی ہدایت دی۔ دریں اثناء محکمہ تعلیم نے 17 اگست سے شروع کرنے کا فیصلہ کیا تھا لیکن یہ فیصلہ ٹاسک فورس کی مخالفت کی وجہ سے ملتوی کر دیا گیا۔
گزشتہ روز بنگلور شہر میں بچوں میں کورونا وائرس پایا گیا جبکہ انڈونیشیا میں بھی بچے بڑی تعداد میں کورونا وائرس کا شکار ہوئے ہیں۔ اس پس منظر میں ڈاکٹر سہاس پربھو کی صدارت میں وزیراعلیٰ ادھو ٹھاکرے کی تشکیل کردہ کمیٹی کی میٹنگ منعقد ہوئی۔
اس کمیٹی کے اجلاس میں اسکول ایجوکیشن ڈپارٹمنٹ کے سکریٹری اور دیگر عہدیدار بھی موجود تھے۔
واضح رہے کہ محکمہ تعلیم نے 17 اگست سے ریاست میں اسکول شروع کرنے کے احکامات جاری کیے تھے لیکن ٹاسک فورس نے اس کی مخالفت کی کیوںکہ چھوٹے بچوں میں اس بیماری کے لیے کوئی مفید دوائیں فی الحال موجود نہیں ہیں۔
اس کے علاوہ بچوں کو ابھی ویکسین دینے کا آغاز بھی نہیں ہوا ہے اس لیے ٹاسک فورس نے خدشہ ظاہر کیا کہ اگر اسکول اچانک کُھل گئے تو یہ مسئلہ ہوگا۔
