اُردو رسائل پڑھنے کا بچوں میں بڑھتا رجحان خوش آئند

ریاست مہاراشٹر میں اردو زبان تہذیب کا حصہ بنی ہوئی ہے، یہی وجہ ہے کہ یہاں کے اسکول و کالجز میں بڑی تعداد میں طلبہ و طالبات اردو میں تعلیم حاصل کرتے ہیں۔

مہاراشٹر میں نہ صرف اردو زبان کا چلن عام ہے بلکہ یہاں بچے اور بڑوں کے درمیان رسائل کے مطالعہ کا بھی رجحان ہے۔
ریاست کے مختلف اضلاع مثلاً اورنگ آباد اور مالیگاؤں وغیرہ اس کی سب سے عمدہ مثالیں ہیں۔

عام طور پر یہ خیال کیا جاتا ہے کہ طلبہ و طابات میں مطالعہ کا رجحان ختم ہوتا جارہا ہے مگر اورنگ آباد میں اس کے برعکس مثال دکھنے کو ملتی ہے۔

حالیہ دنوں میں ریاست تلنگانہ کے 'تلنگانہ اردو اکادمی' سے شائع ہونے والا بچوں کا ماہنامہ 'روشن ستارے' کی پانچ ہزار سے زائد کاپیاں بچوں کے درمیان فروخت ہوچکی ہیں۔
اردو زبان و ادب سے محبت رکھنے والے مرزا عبدالقیوم کی کوششوں سے یہ سب ممکن ہو سکا ہے۔

مرزا عبدالقیوم نے ضلع کے مختلف اسکولوں میں جاکر اس رسالے کا تعارف کرایا جسے بچوں نے بہت شوق سے خریدنے میں دلچسپی دکھائی۔

ان کا کہنا ہے کہ طلبہ و طالبات اردو رسائل پڑھنا چاہتے ہیں مگر بچوں تک رسائی نہیں ہوپاتی ہے، اس کمی کو پورا کرنے کے لیے وہ مختلف اسکولوں کا دورہ کر رہے ہیں اور بچوں تک رسالے پہنچا رہے ہیں۔