پنجاب کے وزیر اعلیٰ نے مرکزی وزیر داخلہ کا شکریہ ادا کیا

پنجاب کے وزیر اعلیٰ کیپٹن امریندر سنگھ نے بتایا کہ مرکزی وزیر داخلہ امت شاہ نے ریاست مہاراشٹر میں پھنسے پنجاب کے لوگوں کو واپس لانے کی درخواست کو تسلیم کر لیا ہے۔

انہوں نے بتایا کہ مہاراشٹر کے ناندیڑ علاقے میں واقع گردوارہ حضور صاحب میں لاک ڈاون کے سبب پنجابی مسافر عقیدت مند پھنس گئے تھے جنہیں پنجاب واپس لانے کی درخواست کی گئی تھی۔

سنگھ نے ٹویٹ کیا کہ 'ابھی ہمیں مہاراشٹر کے وزیراعلیٰ دفتر سے فون کال موصول ہوا ہے اور اس نے اس بات کی تصدیق کی ہے کہ وزیر داخلہ امت شاہ نے پنجابی عقیدت مندوں کو ناندیڑ سے پنجاب لانے کی درخواست تسلیم کر لی ہے۔ ہم نے چیف سکریٹری سے تمام طرح کے انتظامات کرنے کو کہا ہے اور ٹرانسپورٹیشن کے اخراجات ہم برداشت کریں گے۔ آپ سب کا شکریہ۔'

واضح رہے کہ پنجاب کے وزیر اعلیٰ امریندر سنگھ نے مرکزی وزیر داخلہ اور مہاراشٹر کے وزیر اعلیٰ ادھو ٹھاکرے کو خط لکھا تھا اور کووڈ 19 کی وبا کے پھیلنے کے سبب لاک ڈاون کرنے کی وجہ سے ناندیڑ میں واقع گردوارہ حضور صاحب میں پھنسے پنجابی عقیدت مندوں کو پنجاب واپس لانے کی درخواست کی تھی۔