اورنگ آباد: گنٹے واری اسکیم کی مدت میں توسیع کا مطالبہ

ایس ڈی پی آئی کا کہنا ہے کہ 'غیر قانونی پراپرٹی کو قانونی حیثیت دینے کے لیے لائی گئی اسکیم ''گنٹے واری اسکیم'' کی مدت میں توسیع ہونی چاہیے۔ اسی طرح جو فیس وصول کی جارہی ہے وہ غریبوں کی سکت سے باہر ہے۔لہٰذا اسے کم کیا جائے۔'

مہاراشٹر کے اورنگ آباد میں میونسپل کارپوریشن کی جانب سے گنٹے واری اسکیم چلائی جا رہی ہے، جس کے تحت غیر قانونی پراپرٹی کو قانونی حیثیت دی جا رہی ہے لیکن اس اسکیم کی آخری تاریخ تیس اکتوبر تک ہی ہے۔

اِس کے بعد غیر قانونی املاک پر ایک نومبر سے بلڈوزر چلانے کا کمشنر نے انتباہ دیا تھا جس کی مختلف تنظیمیں مخالفت کر رہی ہیں۔

میونسپل کارپوریشن کی گنٹے واری اسکیم کے خلاف ایس ڈی پی آئی نے محاذ کھول دیا ہے۔ ایس ڈی پی آئی کا کہنا ہے کہ غیر قانونی پراپرٹی کو قانونی حیثیت دینے کی معیاد میں توسیع ہونی چاہیے۔ اسی طرح جو فیس وصول کی جارہی ہے وہ غریبوں کی سکت سے باہر ہے، اس لیے احمد نگر پیٹرن پر عمل کرتے ہوئے تمام اہالیان شہر کو موقع دیا جانا چاہیے۔

واضح رہے کہ اس اسکیم کے تحت غیر قانونی تعمیرات کو قانونی حیثیت دی جارہی ہے۔ اسکیم سے استفادہ کی آخری تاریخ تیس اکتوبر مقرر ہے۔ میونسپل ایڈمنسٹریٹر آستک کمار پانڈے نے غیر قانونی املاک پر بلڈوزر چلانے کی دھمکی دی ہے۔