ریلوے پٹریوں پر ہلاک مزدوروں کے ورثا کو فی کس ایک لاکھ روپے کی امداد کا مطالبہ

امبیڈکر نیشنل کانگریس نے ریاست مہاراشٹر کے شہر اورنگ آباد میں ٹرین کی پٹریوں پر ہلاک ہوئے مزدوروں کے ورثا کے لیے فی کس ایک لاکھ روپے کی امداد کا اعلان کرنے کا مطالبہ کیا ہے۔

امبیڈکر نیشنل کانگریس پارٹی کے قومی صدر نواب محمد کاظم علی خان نے یہ اعلان کرتے ہوئے بتایا کہ غریب مزدور کوئی سہولت نہ ہونے کے سبب ریلوے پٹریوں پر سے چلتے ہوئے اپنے آبائی مقامات کو جا رہے تھے ‘یہی ان کا راستہ تھا اور یہی ان کا رین بسیرا بھی۔ بد قسمتی سے یہ لوگ ایک مال گاڑی کی زد میں آگئے اور مقام حادثہ پر ہی ہلاک ہوگئے۔ ان کی ہدایت پر صدر اورنگ آباد مسٹر معین الدین انعامدار نے ضلع کلکٹر اور سپرنٹنڈنٹ پولیس اورنگ آباد کو ایک مکتوب لکھ کر ان مزدوروں کی ہلاکت کے واقعہ کی ایف آئی آر اور پنچنامہ کی نقل طلب کی ہے تاکہ اس کی بنیاد پر ا ن کے ورثا کے نام پر ایک ایک لاکھ روپے کی رقم بینک میں فکسڈ ڈپازٹ کروائی جاسکے۔

انہوں نے کہا کہ غریب مزدوروں کی اس طرح موت ایک سانحہ ہے اور اس کے لیے مرکزی حکومت ذمہ دار ہے ‘کیونکہ اس کی ناقص پلاننگ سے اس قسم کی اموات ہو رہی ہیں‘۔

لوگ سڑکوں پر سیکڑوں ہزاروں کلو میٹر کا سفر پیدل طئے کر رہے ہیں اور ان کو کسی قسم کی سہولت نہیں ہے۔ انہوں نے مرکزی اور ریاستی حکومتوں سے مطالبہ کیا ہے کہ مائیگرنٹ ورکرز کے علاوہ دوسرے غریبوں کی مدد کے لیے بلا لحاظ مذہب و ملت وسیع پیمانہ پر اقدامات کیے جائیں۔