تفصیلات کے مطابق سورن جینتی ایکسپریس میں سفر کر رہا نوجوان، پب جی گیم کھیلنے میں اس قدر منہمک تھا کہ اس نے پانی کے بجائے کیمیکل پی لیا جس کے سبب اس کی موت ہو گئی۔
جب آگرہ کینٹ اسٹیشن پر ٹرین رکی تو نوجوان کے دوست نے جی آر پی کو اطلاع دی۔
جی آر پی نے مہلوک کے اہل خانہ کو اطلاع دی اور کیمیکل قبضے میں لیا ہے۔
واضح رہے کہ گوالیار سے تعلق رکھنے والے سوربھ یادو اور سنتوش شرما دوست ہیں۔ دونوں گوالیار سے آگرہ جانے کے لیے سورن ایکسپریس میں سوار ہوئے۔
آگرہ کینٹ جی آر پی تھانہ کے انچارج انسپکٹر وجے سنگھ نے بتایا کہ صراف کا کام کرنے والے سنتوش شرما کا کہنا ہے دوست سوربھ یادو کے ساتھ اپر برتھ پر بیٹھ کر سفر کر رہے تھے۔ اسے صرافہ بازار سے کچھ سامان خریدنا تھا اس لیے آگرہ جا رہے تھے۔ سوربھ اپنے موبائل میں پب جی گیم کھیلنے میں مصروف تھا۔ اس دوران اس نے غلطی سے پانی کی جگہ کیمیکل پی لیا۔ اس کی موقع پر ہی موت ہو گئی۔
جی آر پی نے لاش کا پنچامہ کر لیا ہے اور مہلوک سوربھ کے اہل خانہ کو اطلاع دی ہے۔ اس کے ساتھ ہی پولیس سنتوش سے پوچھ گچھ کر رہی ہے۔