Yaum-al-Quds: اندور میں یوم القدس کے موقع پر اسرائیل کے خلاف احتجاجی مظاہرہ

مدھیہ پردیش کے اندور میں یوم القدس کے موقع پر اسرائیلی ظلم کے خلاف اور مظلوم فلسطینیوں کی حمایت میں مظاہرے کیے گئے۔

اندور:مدھیہ پردیش کے شہر اندور میں شیعہ مسلم سماج نے یوم القدس کے موقع پر وزیراعظم کے نام میمورنڈم دیا جس میں مطالبہ کیا کہ بیت المقدس کو آزاد کرایا جائے اور فلسطین پر ہو رہے ظلم و ستم کو ختم کرنے کے لیے اقدامات کیے جائیں۔ اندور میں یوم قدس کے موقع پر شیعہ مسلم سماج نے جمعۃ الوداع کی نماز کے بعد اسرائیل کے خلاف زوردار مظاہرہ کیا۔

واضح رہے کہ تقریبا 43 برس قبل ایران کے سپریم رہنما امام آیت اللہ خمینی نے فلسطین کے کے ساتھ یکجہتی کے اظہار اور اسرائیل کی ظلم و ستم کے خلاف یکجا ہونے کے لیے جمعۃ الوداع کے موقع پر یوم قدس منانے کا اعلان کیا تھا۔ تب سے رمضان المبارک کے جمعۃ الوداع کے موقع پر عالمی سطح پر یوم قدس کے طور پر منایا جاتا ہے۔ اس دن اسرائیل کے خلاف دنیا بھر میں احتجاج کیا جاتا ہے۔ اسی مناسبت سے اندور میں شیعہ مسلم سماج نے جمعتہ الوداع کی نماز کے بعد اسرائیل کے خلاف زبردست مظاہرہ کیا۔

اس موقع پر امام مولانا ارشد عباس نے کہا کہ جو انسانیت کے محافظ ہیں، ان کو ظلم و ستم کرنے والوں کو بے نقاب کرنا چاہیے۔ ساتھ ہی مولانا سید حیدر عباس زیدی نے کہا کہ ہم نے وزیراعظم کے نام ایک میمورنڈم دیا ہے جس میں بیت المقدس کو آزاد کرانے پر زور دیا گیا اور غاصب اسرائیلی حکومت کے خلاف احتجاج کیا گیا۔ انہوں نے کہا کہ اسرائیل واحد ایسا ملک ہے جس کو ابھی تک کئی ممالک نے ملک کے طور پر تسلیم نہیں کیا۔ اس کے باوجود اسرائیل کی جانب سے فلسطینیوں پر ظلم و ستم جاری ہے۔