سڑک حادثے میں ایک ہی کنبہ کے تین افراد ہلاک

حادثہ میں پک اپ وین میں سوار شوہر، بیوی اور بیٹے کی موت ہوگئی، جبکہ پک اپ ڈرائیور شدید زخمی ہوگیا جسے ضلع اسپتال میں داخل کرایا گیا ہے۔

مدھیہ پردیش کے ضلع مرینہ کے سرائے چھولہ تھانہ علاقہ میں آج ایک پک اپ وین اور ڈمپر کی ٹکر میں پک اپ پر سوار اترپردیش کے ضلع گوتم بدھ نگر کے رہنے والے ایک ہی کنبہ کے تین افراد ہلاک ہوگئے جبکہ پک اپ وین ڈرائیور زخمی ہوگیا، جسے ضلع اسپتال میں داخل کرایا گیا ہے۔
پولیس ذرائع کے مطابق آگر - ممبئی قومی شاہراہ پر پپرائی نامی گاؤں کے قریب صبح ایک پک اپ وین سامنے سے آرہے ریت سے بھرے ڈمپر سے ٹکرا گئی۔ حادثہ میں پک اپ وین میں سوار شوہر، بیوی اور بیٹے کی موت ہوگئی، جبکہ پک اپ ڈرائیور شدید زخمی ہوگیا جسے ضلع اسپتال میں داخل کرایا گیا ہے۔ مہلوکین کی شناخت ڈاکٹر ایس کے وشواس (38)، بیوی سگوتہ (34) اور بیٹا سوربھ (21) کے نام سے ہوئی ہے۔
پولیس نے بتایا کہ گوتم بدھ نگر کا رہنے والا یہ کنبہ اپنا سامان گاڑی سے لے جا رہا تھا کہ یہ حادثہ پیش آیا۔ پولیس نے حادثہ کے بعد ڈمپر کو ضبط کر لیا، جبکہ مفرور ڈرائیور کی تلاش کی جارہی ہے۔