'کلاؤڈ رڈار' پر مودی کا بیان، راہل کا سوال

کانگریس کے صدر راہل گاندھی نے وزیراعظم نریندر مودی کے 'کلاؤڈ رڈار' کے تبصرے پر نکتہ چینی کرتے ہوئے سوال کیا کہ ' کیا اب بھارت میں بارش ہونے پر تمام ایئر کرافٹ غائب ہو جائیں گے؟'

مدھیہ پردیش کے نیمچ میں ایک عوامی جلسے سے خطاب کرتے ہوئے راہل گاندھی نے کہا کہ 'نریندر مودی نے فضائیہ کے سربراہ اور فوج کے افسروں سے کہا کہ خراب موسم کی وجہ سے رڈار ایئرکرافٹ کا سراغ نہیں لگا سکے گا جس سے فائدہ ہوگا۔ نریندر مودی جی، جب کبھی بھارت میں بارش ہوتی ہے، کیا وہ تمام ایئر کرافٹ رڈار سے غائب ہو جاتے ہیں۔'

حال ہی میں ایک ٹی وی انٹرویو میں مودی نے کہا تھا کہ 'بالاکوٹ اسٹرائک کے لیے بارش بہتر ہے چونکہ اس دوران آئی اے ایف فائٹر جیٹس کو بادل سے مدد ملے گی اور پاکستان کے رڈار سے آپریشن کے دوران بچ سکتے ہیں۔'

راہل گاندھی نے کہا کہ 'جی ایس ٹی اور نوٹ بندی سے بی جے پی نے ملک کی معیشت کو تباہ کر دیا ہے اور ہر 24 گھنٹے میں 27 ہزار نوجوان روزگار سے محروم ہو رہے ہیں۔'