سادھوی پرگیہ کو سیاہ جھنڈا دکھانے پر پارٹی کارکنان برہم

ریاست مدھیہ پردیش کے بھوپال پارلیمانی حلقے میں بی جے پی کی امیدوار سادھوی پرگیہ سنگھ ٹھاکر کو سب ڈوپژنل مجسٹریٹ کے دفتر میں مبینہ طور پر این سی پی کے کارکن نے سیاہ جھنڈا دکھایا۔

اس سے بی جے پی کے اراکین برہم ہو گئے اور انہوں نے اس شخص کو زدوکوب کیا۔

ایک ویڈیو میں نظر آ رہا ہے کہ بی جے پی کے اراکین نعرے بازی کر رہے ہیں اور این سی پی کے کارکن کو مبینہ طور پر سیاہ جھنڈا دکھانے پر طمانچہ رسید کر رہے ہیں۔ بعد ازیں پولیس اس نوجوان کو اپنے ساتھ لے گئی۔

قبل ازیں سادھوی نے روڈ شو کیا اور بھوپال پارلیمانی سیٹ سے پرچہ نامزدگی داخل کیا ہے۔

اس سیٹ پر کانگریس نے پارٹی کے سینیئر رہنما دگ وجے سنگھ کو انتخابی میدان میں اتارا ہے۔

واضح رہے کہ ریاست مہاراشٹر کے مالیگاؤں شہر میں 29 ستمبر 2008 میں بم دھماکے ہوئے تھے۔ اس میں 6 افراد ہلاک اور متعدد زخمی ہوئے تھے۔

تحقیقاتی ایجنسیوں نے اس معاملے میں سادھوی پرگیہ سنگھ ٹھاکر کو کلیدی ملزم قرار دیا ہے۔ فی الحال وہ ضمانت پر باہر ہے۔