مدھیہ پردیش :ریاست میں بی جے پی کی قیادت میں کوئی تبدیلی نہیں ہوگی

مدھیہ پردیش کے وزیر داخلہ نرو تم مشرا اور بی جے کے سینیئر رہنما کیلاش وجے ورگیہ نے ریاستی حکومت میں قیادت کی تبدیلی سے متعلق قیاس آرائیوں کو پوری طرح مسترد کرتے ہوئے کہا ہے کہ شیو راج سنگھ چوہان وزیراعلیٰ تھے،ہیں اور رہیں گے۔

میڈیا کے نمائندوں نے جب قیادت کی تبدیلی سے متعلق سوال کیا تو ریاستی وزیر داخلہ نروتم مشرا اور پارٹی کے سینیئر رہنماکیلاش وجے ورگیہ نے کہا واٹس ایپ ایک ایسی یونیورسٹی ہے، جس کا وائس چانسلر بننے کے لئے کسی اہلیت کی ضرورت نہیں ہوتی ہے، اور یہی وجہ ہے کہ یہ فرضی خبر ہے۔ جو گمراہ کن اور جھوٹ پرمبنی ہے۔

انہوں نے کہا کہ میری اپیل ہے کہ ان باتوں پر توجہ نہ دی جائے۔ انہوں نے کہا کہ شیو راج سنگھ اور وی ڈی شرما کی قیادت میں بھارتیہ جنتا پارٹی مکمل طور پر ایک ہے اور منظم ہے۔ شیو راج سنگھ وزیر اعلی تھے، ہیں اور شیوراج سنگھ وزیر اعلی رہیں گے۔

انہوں نے کہا کہ اس طرح کی قیاس آرائیوں کو نظر انداز اور واٹس ایپ اور فیس بک کی فرضی خبروں پر توجہ نہ دی جائے ۔

انہوں نے کہا کہ سوشل میڈیا پر چل رہی خبریں غلط ہے۔ کورونا اور لاک ڈاون کے دوران لوگوں کے پاس کام نہیں ہے اس لئے سب ایک دوسرے سے ملاقات کر ر ہے ہیں۔

انہوں نے کہا کہ سوشل میڈیا کی فرضی خبروں پر توجہ نہ دی جائے ۔ریاست میں پارٹی کی قیادت میں کوئی تبدیلی نہیں کی جائیگی۔