اندور کے صفہ پبلک اسکول میں جشن اردو کا اختتام

Jashn E Urdu Program Concluded: صنعتی شہر اندور میں صفہ پبلک اسکول میں جشن اردو منایا گیا۔ اس تقریب میں تقریر حمد بحث و مباحثہ تقریر نظم اور تقریر کے مقابلہ ذات منعقد ہوئے فاتح طلبہ کو انعامات سے نوازا گیا۔

اندور:ریاست مدھیہ پردیش کے اندور میں واقع صفہ پبلک اسکول میں منعقدہ جشن اردو پروگرام میں طلبا و طالبات نے بڑے جوش اور جذبے کے ساتھ تقریر، نعت، نظم، مقالے اور اسلامی کوئز مقابلے حصہ لیا۔ کامیاب طلبہ کو ٹرافی اور سرٹیفیکیٹ سے نوازا گیا۔ تین دنوں چلے جشن کے لیے طلبہ کئی دنوں سے تیاریوں میں مشغول تھے۔

ان کا کہنا تھا کہ ہمیں اردو ہفتے کا بے صبری سے انتظار رہتا ہے کیونکہ اس سے ہمارے علم میں مزید اضافہ ہوتا ہے۔ یہ میٹھی اور شریں زباں ہے جو لوگوں کو متاثر کرتی ہے۔ آج بھی کئی اسکولوں میں مغربی تہذیب سے منسلک جشن منعقد ہوتے ہیں جس سے وہ کئی لوگوں کو متاثر تو کر سکتے ہیں مگر معیاری تعلیم اور تہذیب و ثقافت کے سبق سے طلبہ محروم رہ جاتے ہیں جب کہ یہی اصل تعلیم ہے جو معاشرے کو مضبوط کرنے میں اہم کردار نبھاتی ہے۔

اسکول پرنسپل ڈاکٹر راحیلہ خان کا کہنا تھا کہ جشن اردو کا طلبہ کو بے صبری سے انتظار رہتا ہے۔ وہ اردو سے بڑا انس رکھتے ہیں جیسے ہی ہم اس کا اعلان کرتے ہیں، طلبہ بڑے جوش اور جذبے کے ساتھ مقابلہ ذات میں اپنا نام درج کراتے ہیں۔ اسکول کے ڈائریکٹر عبدالغفور خان میو کا کہنا تھا کہ مادری زبان میں تعلیم حاصل کرنا آسان بھی ہوتا ہے اور اثر دار بھی۔ بچے بھی اس زبان میں بڑے ذوق و شوق سے تعلیم حاصل کرتے ہیں۔