الیکشن کمیشن کا اقدام غیر منصفانہ: دگ وجئے سنگھ

دگ وجئے سنگھ نے کہا کہ کانگریس کے رہنما کمل ناتھ پر پابندی غیر منصفانہ اقدام ہے۔ ہم اس پر غور کر رہے ہیں کہ اس معاملے میں کیا قانونی قدم اٹھائے جائیں۔

کانگریس پارٹی کے سینئر رہنما دگ وجئے سنگھ نے مدھیہ پردیش کے سابق وزیر اعلی کمل ناتھ کے خلاف الیکشن کمیشن کی کارروائی پر سوالیہ نشان کھڑا کیا۔

انھوں نے کہا "یہ ایک عجیب و غریب حکم ہے۔ الیکشن کمیشن کی ایڈوائزری کے بعد، کمل ناتھ نے مزید کوئی بیان نہیں دیا جس بیان کے بارے میں بتایا جارہا ہے، وہ 13 اکتوبر کا ہے۔ دگ وجئے سنگھ نے کہا 'میرے خیال میں یہ حکم غیر منصفانہ ہے۔ ہم اس پر غور کر رہے ہیں کہ اس معاملے میں کیا قانونی قدم اٹھائے جائیں۔

الیکشن کمیشن نے بار بار انتخابی ضابطہ اخلاق کی خلاف ورزی کا حوالہ دیتے ہوئے کانگریس کے رہنما کمل ناتھ کی 'اسٹار کیمپینر' کی حیثیت کو منسوخ کر دیا تھا۔

الیکشن کمیشن نے کمل ناتھ کے اسٹار کیمپینر کی حیثیت کو منسوخ کرتے ہوئے اپنے حکم میں کہا ہے کہ اگر کمل ناتھ کمیشن کے حکم کے بعد کسی بھی انتخابی مہم میں شامل ہوتے ہیں تو متعلقہ اسمبلی حلقے کا امیدوار انتخابی مہم کے اخراجات خود ہی برداشت کرے گا۔