کانکنی مافیا کے حملے میں ڈپٹی رینجر زخمی

مدھیہ پردیش کے ضلع شیو پوری کے کریرا سب ڈویژن کے نئے امولا جنگلاتی زون میں کانکنی مافیا کے حملے میں ڈپٹی رینجر سمیت محکمہ جنگلات کا ایک ملازم زخمی ہوگیا۔

محکمہ جنگلات سے موصولہ اطلاعات کے مطابق ڈپٹی رینجر موہن سوروپ گپتا کو سنگین زخم آئے ہیں۔ انہیں ضلعی اسپتال میں داخل کرایا گیا ہے۔ اطلاعات میں بتایا گیا ہے کہ کل دیر شام نئے امولا جنگلاتی زون سے ایک ٹریکٹر ٹرالی غیر قانونی طور پر پتھر بھر کر لے جارہی تھی۔ روکے جانے پر جب ڈرائیور نہیں رکا تو محکمہ جنگلات کی ٹیم نے اپنی گاڑی سے اس کا تعاقب کیا۔ تب تک ٹریکٹر ٹرالی ناولی کے جنگل میں داخل ہوچکی تھی۔
اسی دوران دیگر کانکنی مافیا دوسری گاڑی میں سوار ہوکر آئے اور محکمہ جنگلات کی گاڑی پر فائرنگ شروع کردی جس میں ڈپٹی رینجر اور محکمہ جنگلات کا ایک ملازم زخمی ہوگیا۔ پولیس نے پانچ ملزمین کے خلاف معاملہ درج کرکے ان کی تلاش شروع کردی ہے۔