Iftar Party in Bhopal افطار پارٹی میں مختلف مذاہب کے رہنماؤں کی شرکت

بھوپال میں مولانا برکت اللہ بھوپالی ایجوکیشن سوسائٹی کی جانب سے افطار پارٹی کا اہتمام کیا گیا۔ اس افطار پارٹی میں مختلف مذاہب کے رہنماؤں نے شرکت کی اور قومی یکجہتی کا پیغام دیا۔

بھوپال:ریاست مدھیہ پردیش کے دارالحکومت بھوپال میں مولانا برکت اللہ بھوپالی ایجوکیشن سوسائٹی کے زیر اہتمام افطار پارٹی کا اہتمام کیا گیا جس میں شہر کی معزز شخصیات، مختلف مذاہب کے رہنماؤں کے علاوہ کثیر تعداد مقامی مسلمانوں نے شرکت کی۔ اس موقعے پر پنڈت مہندر شرما، شکیہ پتر بھنتے ساگر، گیانی دلیپ سنگھ، گرو چرن سنگھ اروڑہ، سماجی کارکن لحجا شنکر ہردنیا، پنڈی راکیش نندن، راجندر کوٹھاری، شیلندر سیلی، عیسائی مذہبی رہنما فادر انند مٹنگ نے خصوصی طور پر افطار پارٹی میں شرکت کر کے قومی یکجہتی کا پیغام دیا اور ملک کی ترقی، آپسی بھائی چارہ، امن و امان کے لیے خصوصی دعا کی۔
مولانا برکت اللہ بھوپالی ایجوکیشن سوسائٹی کے ذمہ داروں کی جانب سے مہمانوں کا استقبال کیا گیا۔ اس موقع پر تمام مذاہب کے رہنماؤں نے کہا کہ اس طرح کے پروگرام وقت کی ضرورت ہے۔انہوں نے کہا کہ آج کے افطار پارٹی میں شامل ہو کر بہت خوشی محسوس ہو رہی ہےکیونکہ ہم سب ایک دوسرے کو دعا دے رہے ہیں کے سماج میں امن و امان کے قیام کے غور و خوض کر رہے ہیں۔

انہوں نے کہا کہ آج کی افطار پارٹی میں صاف طور سے یہ نظر آرہا ہے کہ ہم الگ الگ مذاہب کے لوگ ضرور ہیں لیکن ایک پلیٹ فارم پر کھڑے ہیں اور پوری دنیا کو محبت کا پیغام دے رہے ہیں۔کیونکہ تمام مذاہب کی یہی تعلیم ہے کہ آپس میں محبت کریں اور انسانی اقدار کو فروغ دیں۔ مہمانوں نے مزید کہا کہ کہا کہ ہمارا ہندوستان رنگ برنگے پھولوں کا ایک گلدستہ ہے اور آج افطار پارٹی کے بہانے سب ایک جگہ جمع ہوئے ہیں۔ اس سے یہ پتہ چلتا ہے کہ ہم پیار، محبت، امن اور بھائی چارگی کا پیغام عام کرنا چاہتے ہیں۔

انہوں نے کہا کہ آج مولانا برکت اللہ ایجوکیشن سوسائٹی کے ذریعے جو قدم اٹھایا گیا ہےوہ قابل تعریف ہے۔ اور اس طرح کے پروگرام کے اہتمام کی ضرورت ہے، تاکہ لوگ ایک دوسرے کو سمجھیں۔ اس موقعے پر مذہبی رہنماؤں نے کہا کہ روزہ افطار پروگرام آپسی یکجہتی اور بھائی چارے کو مضبوط کرنے میں سنگ میل ثابت ہوگا ۔اس موقع پر انہوں نے مسلمانوں ماہِ رمضان کی خصوصی مبارکباد پیش کی۔