علامہ اقبال کا یوم پیدائش: بھوپال اورعلامہ اقبال کا گہرا تعلق

پورے ملک کے ساتھ ریاست مدھیہ پردیش میں بھی آج یعنی 9 نومبر کو علامہ اقبال کے یوم پیدائش کے موقع پر عالمی یوم اردو منایا جارہا ہے۔ بھوپال کا علامہ اقبال سے گہرا تعلق رہا ہے۔

علامہ اقبال نے بھوپال میں نہ صرف سب سے زیادہ وقت گزارا ہے بلکہ انہوں نے بھوپال میں قیام کے دوران جن 14 نظموں کی تخلیق کی تھی وہ آج بھی اردو ادب کا بیش قیمتی سرمایہ میں سے ایک ہے۔

بھوپال میں اقبال نے راحت منزل، شیش محل، شوکت محل اور ریاض منزل میں قیام کیا تھا۔ اقبال کے انتقال کے بعد متحدہ ہندوستان میں اقبال کی یاد میں سب سے پہلی لائبریری بھوپال میں قائم کی گئی تھی۔ بھوپال میں اقبال مرکز اور اقبال میدان بھی قائم کیا گیا تھا لیکن اقبال میدان خستہ حالی کا شکار ہوتا جا رہا ہے۔

جمیعۃ علماء مدھیہ پردیش کا کہنا کہ بھوپال میں اقبال لائبریری اور اقبال میدان حکومت کی عدم توجہی کے سبب خستہ حالی کا شکار ہو رہے ہیں۔ اس لئے اقبال لائبریری کے وسائل کی جانب توجہ دی جائے۔ ساتھ ہی اقبال میدان کی تزئین کاری بھی کی جائے تاکہ اقبال سے بھوپال کا جو مضبوط رشتہ تھا وہ آنے والی نسلوں تک منتقل کیا جا سکے۔

جمیعت کی جانب سے عالمی اردو ڈے کے موقع پر کہا کہ اردو زبان کی کتابیں بمشکل مہیا ہوتی ہیں اور نہ ہی اردو اساتذہ کی تقرری ریاست میں کی جا رہی ہے جس سے ہماری نسلیں اردو زبان سے دور ہوتی ہوئی نظر آ رہی ہیں۔

واضح رہے کہ آج علامہ اقبال کے یوم پیدائش کے موقع پر جہاں بھوپال کے ادیبوں نے علامہ اقبال اور بھوپال کے رشتے پر روشنی ڈالی تو وہیں جمیت علماء مدھیہ پردیش نے حکومت سے علامہ اقبال کی نشانیوں کو محفوظ کرنے کا مطالبہ بھی کیا۔