بھوپال: مہاتما گاندھی کو خراج عقیدت پیش کی گئی

علی گڑھ مسلم یونیورسٹی اولڈ بوائز ایسوسی ایشن نے آج بھوپال اور مہاتما گاندھی کے تعلق سے پروگرام منعقد کرکے انہیں خراج عقیدت پیش کیا۔

مدھیہ پردیش کے دارالحکومت بھوپال میں علی گڑھ مسلم یونیورسٹی اولڈ بوائز ایسوسی ایشن کے زیر اہتمام آج مہاتما گاندھی جی کی 73 ویں برسی کے موقع پر بھوپال اور مہاتما گاندھی کے تعلق سے پروگرام منعقد کیا گیا۔ پروگرام میں علی گڑھ مسلم یونیورسٹی کے طلباء کے ساتھ بڑی تعداد میں لوگوں نے شرکت کی۔ اس موقع پر مہاتما گاندھی کی بھوپال سے جڑی یادوں کو تازہ کیا گیا۔ مقررین نے بتایا کہ مہاتما گاندھی دو بار بھوپال تشریف لائے تھے۔ بھوپال نواب حمیداللہ خان چاہتے تھے کہ ملک کی آزادی میں بھوپال کی بھی حصہ داری ہو۔

مہاتما گاندھی جب بھوپال آئے تو انہوں نے ملک کی سب سے خوبصورت جگہ بھوپال کو قرار دیا۔

بھوپال کے بے نظیر گراؤنڈ میں گاندھی جی نے تقریر کرتے ہوئے کہا تھا کہ میں ہندوستان میں رام راج چاہتا ہوں، مگر میرا مطلب ہندو راج سے نہیں بلکہ میرے دل میں رام اور رحیم کے بیچ کوئی فرق نہیں ہے۔ میں ایسا راج چاہتا ہوں جہاں انسان ہی نہیں بلکہ جانور بھی آزادی کے ساتھ رہ سکے۔

اس موقع پر علی گڑھ مسلم یونیورسٹی اولڈ بوائز ایسوسی ایشن کے رکن ایم ڈبلیو انصاری نے کہا کہ، 'جہاں جہاں پر بھوپال میں مہاتما گاندھی رکے تھے، ان جگہوں کو عام لوگوں کے لیے کھولا جانا چاہیے تاکہ لوگ مہاتما گاندھی کے تعلق سے معلومات حاصل کرسکیں۔'