جبل پور میں کرفیو نافذ انٹرنیٹ خدمات معطل

ریاست مدھیہ پردیش کے شہر جبل پور کے چار تھانہ علاقوں میں کرفیو نافذ کردیا گیا ہے اور اس ساتھ ہی انٹرنیٹ خدمات معطل رکھنے کا بھی فیصلہ کیا گیا ہے۔

ریاست مدھیہ پردیش کے شہر جبل پور سمیت ملک بھر میں شہریت ترمیمی قانون کے خلاف پرتشدد مظاہروں کا سلسلہ جاری ہے۔
مدھیہ پردیش کے کئی علاقوں میں سی سی اے کے خلاف مظاہرے ہوئے جس کے مدنظر جبل پور شہر کے چار تھانہ علاقوں میں کرفیو نافذ کر دیا گیا کیونکہ کچھ مظاہرین نے پولیس پر پتھراؤ کیا۔ ماحول کو خراب ہوتے دیکھ کر انٹرنیٹ خدمات کو بند کر دیا گیا ہے۔

جن چار علاقوں میں کرفیو نافذ کیا گیا ہے ان میں گوہل پور اور ہنومان تال پولیس اسٹیشن علاقہ، ادھارتال اور کوتوالی تھانہ علاقہ شامل ہیں۔ دراصل منڈی مدار ٹیکری علاقے میں جمہ کی نماز کے بعد جمع ہونے والے لوگوں میں سے کچھ مظاہرین نے پولیس اہلکاروں پر پتھراؤ کرنا شروع کر دیا۔ اس واقعے کے بعد پولیس نے لوگوں کو منتشر کرنا شروع کر دیا۔ جس کے بعد پتھربازی اور بڑھ گئی۔ اس دوران 6 پولیس اہلکار زخمی ہوئے۔ پتھراؤ کے واقعے نے پورے علاقے میں تناؤ کی فضا پیدا کر دی ہے۔

شہری علاقوں میں انٹرنیٹ کی سہولیات آج شام 6 بجے تک بند کر دی گئی ہیں۔ وہ علاقہ جہاں کرفیو نافذ کر دیا گیا ہے۔ وہاں بڑی تعداد میں پولیس کو تعینات کیا گیا ہے۔ پولیس کا کہنا ہے کہ مظاہرین کو بخشا نہیں جائے گا۔ نیز پولیس نے لوگوں سے تحمل کا مظاہرہ کرنے کی اپیل کی ہے۔