کپواڑہ میں سرحد پر فائرنگ، لوگوں میں خوف و ہراس

جموں و کشمیر کے شمالی ضلع کپواڑہ کے کرناہ علاقے میں لائن آف کنٹرول پر بھارت اور پاکستان کی فوج کے مابین بھاری فائرنگ کے تبادلے سے لوگوں میں سراسیمگی اور خوف و دہشت ہے۔

ای ٹی وی بھارت کے نمائندے کے مطابق منگل کے روز قریب ڈھائی بجے دن کرناہ کے بٹ پورہ علاقے میں لائن آف کنٹرول پر بھارت اور پاکستان کی فوج کے درمیان شدید فائرنگ اور گولہ باری کا تبادلہ شروع ہوتے ہی لوگ اپنے گھروں اورمحفوظ مقامات کی طرف بھاگنے لگے۔

دریں اثنا ایک پولیس افسر نے طرفین کے درمیان گولہ باری کے تبادلے کی تصدیق کرتے ہوئے کہا کہ لوگوں کو محفوظ مقامات کی طرف جانے کی صلاح دی گئی ہے۔

علاقے میں گولہ باری کا تبادلہ شروع ہوتے ہی تعلیمی ادارے اور دکان بند ہوگئے اور لوگ گھروں کی طرف بھاگنے لگے۔

عینی شاہدین نے بتایا کہ گولہ باری کی آوازیں کپواڑہ کے ضلع ہیڈ کوارٹر میں بھی سنی جارہی تھیں۔