کشمیر: بینک گارڈ سے ہتھیار چھیننے کی کوشش، سیکورٹی گارڈ نے کی ہوائی فائرنگ

جنوبی کشمیر کے قاضی گنڈ علاقے میں اُس وقت جموں وکشمیر بینک کے سیکورٹی گارڈ نے ہوا میں گولیاں چلائیں جب ایک مقامی نوجوان نے جھگڑے کے بعد ان سے ہتھیار چھیننے کی کوشش کی۔

جنوبی کشمیر میں ضلع کولگام کے چوگام علاقے میں واقع جموں و کشمیر بینک میں تعینات سیکورٹی گارڈ اور ایک مقامی نوجوان کے مابین تلخ کلامی کے بعد مقامی نوجوان نے دیگر ساتھیوں کی مدد طلب کی جس پر بینک گارڈ نے ہوا میں فائرنگ کی۔

گولیوں کی آواز سنائی دینے کے بعد کولگام پولیس موقعے پر پہنچی اور معاملے کی تحقیقات کرنے کے بعد ایس ایس پی کولگام نے بتایا کہ ’’تو تو میں میں ہونے کہ وجہ سے بینک گاڈ نے ہوا میں گولیاں چلائیں۔‘‘

انہوں نے کہا کہ ’’مقامی نوجوان اسلحہ چھیننے کی غرض سے نہیں آیا تھا۔‘‘

انہوں نے مزید کہا کہ پولیس نے لڑائی جھگڑے کی نسبت سے مقامی پولیس اسٹیشن میں ایک کیس درج کر لیا ہے۔

ایس ایس پی نے اس واقعے کو ایک مقامی جھگڑے سے تعبیر کرتے ہوئے اسکے کسی عسکری تنظیم سے وابستہ ہونے کی خبروں کو مسترد کر دیا۔