کولگام: طبی عملے میں پی پی ای کِٹس تقسیم

جنوبی کشمیر کے ضلع کولگام میں راجیہ سبھا ممبر نے فوج کے اشتراک سے طبی عملے میں پی پی ای کِٹس تقسیم کیے۔

کوروناوایئرس کے پھیلائو کو روکنے کے لیے جہاں انتظامیہ مستعدی سے کام لے رہی ہیں وہیں ڈاکٹروں کی حفاظت کے پیش نظر جنوبی ضلع کولگام میں طبی عملے میں پی پی ای کِٹس (PPE Kits) تقسیم کیے گئے۔

راجیہ سبھا ممبر نظیر احمد لاوے نے فوج کے اشتراک سے طبی عملے میں یہ کِٹس تقسیم کیے۔

اس موقعے پر ذرائع ابلاغ کے نمائندوں کے ساتھ بات کرتے ہوئے نذیر احمد لاوے کا کہنا تھا کہ ’’طبی عملے کی حفاظت اور حفاظتی ملبوسات و آلات جن میں ماسک، دستانے وغیرہ شامل ہیں کی قلت کے پیش نظر پی پی ای کٹس تقسیم کیے گئے۔‘‘

نظیر لاوے کے مطابق انہوں نے اس ضمن میں فوج کا تعاون طلب کیا اور فوج کی ہی وساطت سے یہ کٹس تقسیم کیے گئے۔

انکے مطابق ’’طبی عملے کی حفاظت کو مد نظر رکھتے ہوئے مستقبل میں بھی مزید ایسے اقدامات اٹھائے جائیں گے۔‘‘

انہوں نے لوگوں سے تعاون طلب کرتے ہوئے لاک ڈائون کو یقینی بنانے اور غیر ضروری طور گھروں سے باہر نہ نکلنے کی تلقین کی ہے۔