جنوبی کشمیر کے ضلع کولگام میں اس وقت کہرام برپا ہو گیا جب ایک تیندوے نے دو افراد پر حملہ کرکے انہیں زخمی کر دیا۔
نمائندے کے مطابق یہ واقعہ ضلع کولگام کے دمہال ہانجی پورہ علاقے میں پیر کی دوپہر کو پیش آیا۔
عینی شاہدین کے مطابق تیندوے نے دو افراد پر اُس وقت حملہ کیا جب وہ جنگل کے راستے سے اپنے گھر کی طرف جا رہے تھے۔ زخمیوں کی شناخت فینسی جان دختر عبدالزراق اور ادریس احمد ولد آزاد احمد نائک کے طور پر ہوئی ہے۔
زخمی افراد کو فوری طور علاج و معالجے کے لئے پی ایچ سی منزگام لایا گیا جہاں ابتدائی طبی امداد کے بعد انہیں ڈاکٹروں نے مزید علاج و معالجے کے لیے ضلع اسپتال کولگام منتقل کیا۔
اس واقعے کے بعد علاقے میں خوف کا ماحول ہے۔
اس ضمن میں مقامی باشندوں نے دکھ کا اظہار کرتے ہوئے کہا کہ ’’آئیے روز اس طرح کے واقعات پیش آ رہے ہیں۔‘‘
علاقے کے لوگوں نے محکمہ وائلڈ لائف سے گزارش کی ہے کہ وہ جنگلی جانوروں اور انسانوں کے تصادم کو کم کرنے سے متعلق سنجیدہ اور ٹھوس اقدامات اٹھائے۔