کولگام: بچوں کی عید پھیکی رہی

بچوں کے مطابق معاشی و مالی بحران کی وجہ سے بچوں کو نہ ہی عیدی ملی اور نہ ہی نئے کپڑے سلوائے گئے۔ بچوں نے عید کا بیشتر وقت اپنے گھروں میں ہی گزارا۔

جموں و کشمیر کے ضلع کولگام میں کورونا وائرس کے پیشِ نظر عید کی نماز عیدگاہ میں نہیں ہوسکی۔ عید گاہ میں خاموشی رہی، اس وجہ سے بچے بھی گھر پر ہی قید رہے۔

گزشتہ دو سال سے جاری کورونا وائرس وبا کے پیشِ نظر مذہبی تہواروں کو محدود کرنے کی وجہ سے بچے کافی متاثر ہوگئے ہیں۔ اسی ضمن میں عید الاضحیٰ کے موقع پر بھی بچے گھر میں ہی رہے۔ عید کے روز بارش کا سلسلہ جاری رہا اور کورونا وائرس کے سبب عیدگاہ میں کوئی تقریب نہ ہونے کی وجہ سے وہ عیدگاہ نہیں جاسکے۔

بچوں کے مطابق کورونا وبا کی وجہ سے ان کے والدین کا کاروبار متاثر رہا جس کی وجہ سے وہ نئے کپڑے نہیں سلوا سکے اور نہ ہی زیادہ عیدی ملی۔

آئمہ مساجد اور علماء اکرام نے عید قربان کا فلسفہ بیان کرتے ہوئے حضرت ابراھیم اور حضرت اسمٰعیل علیہما السلام کی تعلیمات پر عمل پیرا ہونے کی تلقین کی۔ مسلسل بارشوں اور کووڈ کے چلتے فرزندان توحید نے عید کو سادگی سے منانے میں ہی عافیت سمجھی۔