کشتواڑ میں انتخابات کی تیاریاں زوروں پر

ریاست جموں و کشمیر کے پہاڑی ضلع کشتواڑ میں کئی دنوں تک خراب حالات کے بعد انتظامیہ انتخابات کی تیاریوں میں جٹی ہوئی ہے۔

یاد رہے کہ ضلع کشتواڑ میں پچھلے ہفتے آر ایس ایس کارکن چندر کانت شرما اور ان کے ذاتی محافظ کو نامعلوم بندوق برداروں نے ہلاک کیا تھا جس کے بعد ضلع میں حالات بے حد کشیدہ ہوئے تھے اور انتظامیہ کی جانب سے کرفیو کا نفاذ عمل میں لایا گیا تھا۔

ضلع ترقیاتی کمشنر، کشتواڑ انگریز سنگھ رانا نے ای ٹی وی بھارت سے بات کرتے ہوئے کہا کہ پچھلے ایک ہفتے سے ناسازگار حالات کے چلتے اور الیکشن نزدیک آنے کی وجہ سے ضلع میں کرفیو ہٹا دیا گیا ہے۔

انہوں نے تفصیلات فراہم کرتے ہوئے کہا کہ ’’انتخابی عملے کو بذریعہ طیارہ مڑواہ، واڑون پہنچایا گیا ہے اور واڑون میں 28 پولنگ بوتھ قائم کئے گئے ہیں، جبکہ مزید عملے کو بھی روانہ کیا جا رہا ہے۔‘‘

رانا نے امید ظاہر کی کہ جمعرات کو ہونے والے انتخابات میں کشتواڑ کی عوام بڑھ چڑھ کر شرکت کرے گی۔

انہوں نے کہا کہ ’’کشتواڑ میں حالات بہتر ہیں اور الیکشن پر امن طریقے پر منعقد ہونگے۔‘‘