کشتواڑ: درختوں کے ساتھ لٹکتی بجلی تاریں

ریاست جموں کشمیر کے پہاڑی ضلع کشتواڑ میں محکمہ بجلی نے کھمبوں کے بجائے بجلی تاروں کو درختوں کے ساتھ باندھ رکھا ہے۔

ضلع صدر مقام سے چند ہی کلو میٹر کے فاصلے پر بلاک ٹھاکرائی کی عوام محکمہ بجلی سے سخت نالاں ہے۔

مقامی باشندوں نے ای ٹی وی بھارت کے ساتھ بات کرتے ہوئے کہا کہ محکمہ پی ڈی ڈی نے علاقے میں بجلی ترسیلی لائنوں کو کھمبوں کے بجائے درختوں کے ساتھ باندھ رکھا ہے۔ جس سے مال مویشی ہی نہیں انسانی جانوں کو بھی ہر وقت خطرہ لاحق رہتا ہے۔

انہوں نے کہا کہ بجلی کی بوسیدہ تاریں گِر آنے کی وجہ سے انکے کئی مال مویشی ہلاک ہو چکے ہیں۔

انہوں نے محکمہ پی ڈی ڈی پر انکے علاقے کو جان بوجھ کر نظر انداز کرنے کا الزام عائد کیا۔

مقامی باشندوں کے مطابق انہوں نے اس ضمن میں کئی بار متعلقہ محکمہ اور انتظامیہ کو اس بارے میں با خبر کیا ’’مگر ابھی تک نہ ہی کھمبے نصب کئے گئے اور نہ ہی نئی تاریں لگوائی گئیں۔‘‘