سونا اسمگلنگ کیس کو لیکر اپوزیشن مستقل طور پر وزیراعلیٰ پنارائی وجین پر استعفیٰ دینے کےلیے دباؤ ڈالنے میں مصروف ہے۔ اپوزیشن رہنما رمیش چینیتھالا نے آج سی پی آئی۔ایم کے جنرل سکریٹری سیتا رام یچوری کو خط لکھا ہے۔
رمیش چینیتھالا نے خط میں سیتا رام یچوری کو وجین کی سربراہی والی ریاستی حکومت میں بگڑی ہوئی صورتحال سے واقف کروایا اور اس معاملے میں ان سے مداخلت کی اپیل کی۔
خط میں یچوری سے کہا گیا کہ ’آپ کی پارٹی سیاست میں اعلیٰ اخلاقی بنیادوں کا دعویٰ کرتی ہے۔ آپ کو ریاست میں پیش آنے والے واقعات کی وضاحت کرنی چاہئے اور وزیراعلیٰ کے خلاف کاروائی کرنی چاہئے۔
رمیش نے لکھا کہ ’یہ بتانا بے معنیٰ ہوگا کہ وزیراعلیٰ اپنے دفتر میں ہونے والے کام سے بے خبر ہوں‘۔ انہوں نے الزام عائد کرتے ہوئے کہا کہ ریاستی انتظامیہ بدعنوانی، اقربا پروری اور مجرمانہ سرگرمیوں میں ملوث ہے جبکہ انہوں نے باوقار عہدہ پر فائز پارٹی کے رہنماؤں کے سی پی آئی (ایم) کے اعلان کردہ نظریہ اور ضابطہ اخلاق سے انحراف کا خدشہ ظاہر کیا ہے۔
واضح رہے کہ کیرالہ میں وزیراعلیٰ کے سابق پرنسپل سکریٹری اور سابق آئی ٹی سکریٹری ایم سیوشنکر کو سونے کی اسمگلنگ کیس کے سلسلے میں زیر التوا چھان بین کے دوران ملازمت سے معطل کردیا گیا۔
این آئی اے نے سونا اسمگلنگ ریاکٹ کو بے نقاب کرتے ہوئے کیرالا کے چیف منسٹر کے ایک سکریٹری اور ایک خاتون کے ملوث ہونے کا پتہ چلنے پر انہیں گرفتار کیا گیا تھا اور ابتدائی تحقیقات میں یہ معلوم ہوا ہے کہ حیدرآباد سے بھی حوالہ کے ذریعہ بھاری رقومات دبئی منتقل کی گئی تھی۔ تحقیقات میں یہ بھی پتہ چلا ہے کہ سونے کی اسمگلنگ کےلیے سفارتی چینل کا بھی استعمال کیا جارہا تھا اور اس سلسلہ میں متحدہ عرب امارات کے قونصل خانہ کے پی آر او کو بھی گرفتار کیا جاچکا ہے۔
قبل ازیں کیرالہ کے بین الاقوامی ہوائی اڈے پر کسٹم حکام نے ایک پارسل سے سونا برآمد کیا تھا۔ یہ پارسل تھروننتھاپورم میں متحدہ عرب امارات کے قونصل خانے کے نام پر آیا تھا جبکہ متحدہ عرب امارات نے پارسل سے لاعلمی کا اظہار کیا تھا۔
