معطل جونیئر اسٹاف نرسوں کا مظاہرہ

کٹھوعہ میں 47 کنٹریکچول اسٹاف نرسوں کو اچانک برخواست کئے جانے کے بعد اسپتال انتظامیہ کے خلاف نرس سڑکوں پرہیں، دو دن قبل ہی ان اسٹاف نرسوں نے میڈیا کے سامنے اسپتال انتظامیہ کو مکمل کیٹ نہ ہونے کے متعلق شکایت کی تھی۔

گذشتہ دنوں کٹھوعہ میڈیکل کالج میں تقرر 47 کانٹریکچول جونیئر اسٹاف نرس کو اچانک برخواست کئے جانے کے بعد آج جونیئر اسٹاف نے سرکاری میڈیکل کالج کے گیٹ کے سامنے دھرنا دیا اور مظاہرہ کیا۔

مظاہرہ شروع ہونے کے کچھ دیر بعد ہی وہاں پولیس پہنچ گئی۔ پولیس نے انہیں کورونا وائرس کا حوالہ دیتے ہوئے موجودہ حالات کے پیش نظر وہاں سے اٹھنے کے لئے کہا، جس کے بعد جونیئر اسٹاف کو وہاں سے ہٹایا گیا۔

جونیئر اسٹاف نرسوں کا کہنا ہےکہ بغیر کسی نوٹیفکیشن کے انہیں برخواست کر دیا گیا ہے۔

انہوں نے بتایا کہ انہیں ایس آر او 24 کے تحت سرکاری میڈیکل کالج میں تعینات کیا گیا تھا۔

واضح ہو کہ جونیئر اسٹاف نے دو دن قبل ہی میڈیا کے سامنے انتظامیہ کو اس بات کے لئے متنبہ کیا تھا کہ ان کے پاس مکمل کیٹ موجود نہیں ہے، جس کے بعد انتظامیہ نے کاروائی کرتے ہوئے 47 اسٹاف نرس کو برخواست کر دیا۔

اسٹاف نرسوں نے کہا کہ اس وقت ان کی کوئی نہیں سن رہا ہے اور انتظامیہ اپنی مرضی سے کام کر رہا ہے، جسے وہ برداشت نہیں کر سکتیں۔