بنگلور: وی کے عبید اللہ سرکاری اسکول کے مسائل میں اضافہ

تقریباً دو برس قبل آئی. ایم. اے کمپنی نے اسے گود لیا تھا اور اسکول کے لئے بڑی عمارت کی تعمیر کر کے اس کی دیکھ بھال کر رہی تھی لیکن اس کمپنی میں بدعنوانی کے بعد اسکول کی پریشانیوں میں کافی اضافہ ہوا ہے۔

ریاست کرناٹک کے دارالحکومت بنگلور میں آئی. ایم. اے ہلال سرمایہ کاری بدعنوانی کے بعد گزشتہ کئی مہینوں سے شہر کے شیواجی نگر میں واقع وی کے عبید اللہ سرکاری اسکول کئی مسائل کا سامنا کر رہا ہے۔

گزشتہ کانگریس و جے. ڈی. ایس کی مشترکہ حکومت کے دوران سابق وزیر برائے اقلیتی بہبود نے اس اسکول کے موثر انتظامات و اخراجات کی دیکھ بھال کے لئے شہر کے معروف وقف ادارہ حضرت حیمد شاہ حضرت محیب شاہ ٹرسٹ کے حوالے کی تھی، تاہم ان مسائل کا مکمل حل نہ ہوسکا۔

اسکول کے مسائل کو حل کرنے کے لیے شیواجی نگر کے ایم. ایل اے رضوان ارشد نے وی. کے عبید اللہ اسکول کا دورہ کیا اور حضرت حمید شاہ کمیٹی اور محکمہ تعلیم کے مقامی افسران سے میٹنگ بھی کی۔

میٹنگ میں انہوں نے یقین دلایا کہ وہ اسکول کے نہ صرف مسائل کو حل کرنے بلکہ اس کی ترقی کے لئے ایک کمیٹی تشکیل دیں گے اور خود اس کی نگرانی بھی کریں گے۔

اس موقع پر نامہ نگاروں سے بات کرتے ہوئے رضوان ارشد نے بتایا کہ آنے والے دنوں میں ہماری یہ کوشش رہے گی کہ اس اسکول کے تعلیمی معیار میں جو کمی آئی ہے اسے پر کریں۔

واضح رہے کہ تقریباً دو برس قبل آئی. ایم. اے کمپنی نے اسے گود لیا تھا اور اسکول کے لئے بڑی عمارت کی تعمیر کر کے اس کی دیکھ بھال کر رہی تھی لیکن اس کمپنی میں بدعنوانی کے بعد اسکول کی پریشانیوں میں کافی اضافہ ہوا ہے۔