Rahul Gandhi Disqualified نریندر مودی کی حکومت کی بزدلی سامنے آگئی ہے،سدا رمیا

کانگریس پارٹی کے رہنما سدا رمیا نے بی جے پی اور وزیر اعظم نریندر مودی پر تنقید کرتے ہوئے کہا کہ مودی حکومت نے راہل گاندھی کی لوک سبھا کی رکنیت سے نااہل قرار دے کر اپنی بزدلی کا مظاہرہ کیا ہے۔

ریاست کرناٹک سے کانگریس پارٹی کے رہنما اور حزب اختلاف کے رہنما سدارامیا نے کہا کہ وزیر اعظم نریندر مودی ہمارے رہنما راہل گاندھی کا سامنا کرنے سے خوفزدہ ہیں۔ انہوں نے کہا کہ راہل گاندھی نے ہمیشہ سچائی اور دیانتداری دکھائی ہے،اور اسی سچائی اور دیانتداری سے خوفزدہ ہوکر مودی حکومت نے انہیں لوک سبھا کی رکنیت سے نااہل قرار دے کر اپنی بزدلی کا مظاہرہ کیا ہے. سدارامیا نے مزید کہا کہ آج کے اس دن کو بھارت کی پارلیمانی جمہوریت میں ایک سیاہ دن کے طورپر رکھا جائیگا۔

انہوں نے سورت کورٹ کے فیصلے کے تناظر میں کئی ٹویٹس کرتے ہوئے کہا ہے کہ بھارتیہ جنتا پارٹی بد عنوانیوں سے بھری ہوئی ہے۔ اس نے اپنی ہی تباہی کے تابوت میں آخری کیل ٹھونک دی ہے۔ ہم اس ناانصافی کے خلاف عدالتوں کا رخ کرینگے اور سڑکوں پر اتر کر حکومت کے ظلم کے خلاف لڑائی لڑیں گے۔ انہوں نے مزید کہا کہ بھارت میں آج غیر سرکاری طورپر ایمرجنسی کا اعلان کر دیا گیا ہے۔ یہ صرف کانگریس پارٹی یا راہل گاندھی کے لئے خطرہ نہیں ہے بلکہ ان تمام جمہوریت پسندوں کے لیے خطرہ کی گھنٹی ہے جو ناانصافی کے خلاف آواز اٹھاتے ہیں۔

سدارامیا نے مزید کہا کہ ملک کے تمام سیاسی جماعتوں کو آپسی اختلافات کو فراموش کرتے ہوئے متحد ہوکر موجودہ حکومت کے آمرانہ رویہ کے خلاف اپنی آواز بلند کرنی ہوگی- انہوں نے مزید کہا کہ یہ بات مبنی بر حقیقت ہے کہ ہمارے رہنما راہل گاندھی کے خلاف کی گئی کارروائی سے کانگریس پارٹی کے لاکھوں کارکنان کو تکلیف پہنچی ہے، لیکن ہمیں تحمل سے کام لینا ضروری ہے۔