کرناٹک میں کووڈ-19 ٹیکنیکل ایڈوائزری کمیٹی نے ریاستی حکومت سے دسمبر تک اسکول نہ کھولنے کی سفارش کی ہے۔ تاہم ریاستی حکومت نے ابھی تک اس پر کوئی فیصلہ نہیں کیا ہے۔ وبا کے سبب ریاست میں اسکول مارچ سے بند ہیں۔
کمیٹی کی صدارت ایم کے سدرشن نے اتوار کو ہونے والی میٹنگ میں کہا 'ریاست میں کورونا کے معاملوں پر قابو پانے سے قبل اسکولوں کو دوبارہ کھولنا مناسب نہیں ہے۔ وزیر اعلی بی ایس یدیورپا نے پیر کے روز ابتدائی اور ثانوی تعلیم کے وزیر ایس سریش کمار اور محکمہ کے عہدیداروں کے ساتھ میٹنگ کی ہے'۔
محکمہ پرائمری اور ثانوی تعلیم کے ذریعہ جلد ہی دسویں اور بارہویں کے طلباء کے لیے اسکولوں کو کھولے جانے کے لیے ہدایت دینے کاامکان ہے۔ بیشتر پرائیویٹ اسکولوں نے آن لائن کلاسز شروع کردی ہیں۔