سرکاری اردو پرائمری اسکولز ابتدائی تعلیم سے محروم

ریاست کرناٹک کے ہاویری ضلع میں سرکاری اردو پرائمری اسکولوں میں اردو ایل کے جی اور یوکے جی کلاسز نہیں ہیں. جس سے مسلم بچوں کو مشکلات کا سامنا کرنا پڑرہا ہے۔ علاقے کے ذی ثروت افراد اپنے بچوں کو نجی انگریزی اسکولوں میں ابتدائی تعلیم کے لیے داخلہ کرا دیتے ہیں اور غریب عوام کے بچے ابتدائی تعلیم سے محروم رہتے ہیں۔

اس سلسلے میں ایس ڈی ایم سی کے سابق صدر ڈاکٹر ناصر خان پٹھان نے ای ٹی وی بھارت کو بتایا کہ پانچ برس قبل کرناٹک حکومت کی جانب سے اعلان کیا گیا تھا کہ مسلم اکثریتی علاقوں میں واقع سرکاری پرائمری اردو اسکولوں میں اردو نرسری کلاسز کی بنیاد ڈالی جائے گی، تاہم حکومت کی طرف سے کیا گیا یہ وعدہ ابھی تک پورا نہ ہوسکا۔

انھوں نے ریاست کرناٹک کے مائینارٹی وزیر ضمیر احمد سے اپیل کی کہ ریاست کرناٹک کے سرکاری پرائمری اردو اسکولوں میں اردو نرسری کا آغاز کیا جائے، تاکہ بچوں کو اپنی زبان میں اپنی مذہبی تہذیب اور ادب سیکھنے میں آسانی ہو۔