کرناٹک کے ضلع یادگیر میں گزشتہ دو ماہ سے جاری لاک ڈاؤن کی وجہ سے عام لوگوں کو کافی دشواریوں کا سامنا کرنا پڑرہا ہے، ایسے ماحول میں چند غیر سیاسی تنظیموں کے ذمہ داران غرباء اور ضرورت مند لوگوں کے درمیان مسلسل کھانا تقسیم کررہے ہیں۔
ایسی ہی ایک تنظیم ملت کمیٹی شاہ پور ہے جو پچھلے 22 دن سے مسلسل شہر کی غریب بستیوں میں بسنے والے احباب کو دوپہر کا کھانا مہیا کرارہی ہے۔
اس تعلق سے مقامی نوجوانوں نے میڈیا سے بات کرتے ہوئے کہا کہ ملت کمیٹی شاہ پور کی جانب سے پچھلے 22 دنوں سے شہر کے غریب محلہ جات میں رہنے والے احباب کے لئے دوپہر کا کھانا مہیا کرایا جارہا ہے۔ اس کام میں ملت کمیٹی کے دیگر کارکنان اپنا مکمل تعاون دے رہے ہیں۔
مقامی باشندہ محمد سلیم نے ملت کمیٹی کے اس اقدام کی ستائش کرتے ہوئے کہا کہ نوجوانوں کے اس کام کو مکمل کرنے میں باورچی احباب کا بڑا تعاون ہے جو اپنا قیمتی وقت نکال کر مفت میں ہر روز غریب مسکینوں کے لیے کھانا بناتے ہیں۔ ہم ان کا تہہ دل سے شکریہ ادا کرتے ہیں کہ یہ لوگ کمیٹی کے کام کو آگے بڑھانے میں اپنا تعاون پیش کر رہے ہیں۔