کرناٹک: مسجد میں جمع ہونے والوں پر پولیس کی کاروائی

ملک میں جاری لاک ڈاؤن اور کورونا وائرس کی وجہ سے کسی بھی قسم کے اجتماع پر پابندی عائد کی گئی اس کے باوجود مسجد میں نماز کے لیے جمع ہونے پر مصلیان کو پولیس نے پیٹا۔

ریاست کرناٹک کے ضلع ہاویری کے سونور شہر میں واقع مسجد میں ممانعت کے باوجود نماز پڑھنے کے لیے آنے والوں پر پولیس نے کاروائی کی اور انہیں پیٹا۔

تفصیلات کے مطابق کورونا وائرس کے پیش نظر پورے ملک میں لاک ڈاؤن کے سبب دفعہ 144 نافذ کی گئی ہے جس کے تحت ایک ہی جگہ پانچ لوگ اکٹھا نہیں ہوسکتے اس کے باوجود مسجد میں تقریباً 30 افراد نماز کے لیے جمع ہوئے۔

اس بات کی اطلاع جب پولیس کو ملی تو انہوں نے کاروائی کرتے ہوئے مسجد میں موجود تمام افراد کو پیٹا۔

واضح رہے کہ مذکورہ علاقے میں ابھی تک کورونا وائرس کا ایک بھی معاملہ سامنے نہیں آیا ہے لیکن عوام کی اس طرح کی لاپرواہی سے خدشات پیدا ہوجاتے ہیں اسی لیے عوام کو چاہیے کہ وہ ایسا کوئی بھی کام نا کریں جس کی وجہ سے مشکلات میں اضافہ ہو۔