'کرناٹک حکومت کورونا وائرس کی روک تھام میں ناکام'

ریاست کرناٹک کے ضلع یادگیر کے کانگریس دفتر میں سنیچر کے روز سابق ریاستی وزیر پرینک کھرگے و رکن اسمبلی چتاپور کی آمد پر ایک اجلاس منعقد کیا گیا۔

اجلاس کی صدارت کانگریس کے ضلع صدر مری گوڈا نے کی جبکہ سابق قانون ساز کونسل کے رکن چنا ریڈی، شاہپور سے رکن اسمبلی دشنا پور، ضلعی اقلیتی سیل کے صدر لائق حسن بادل، سینئر کانگریس رہنما سرینواس ریڈی کے علاوہ کانگریس کے دیگر ذمہ داران نے مہمانان خصوصی کے طور پر شرکت کی۔

اس موقع پر سابق ریاستی وزیر ورکن اسمبلی چتا پور پرینک کھرگے نے اپنے خطاب میں کہا کہ 'کرناٹک میں بڑے پیمانے پر کورونا وائرس کے پھیلاؤ کو روکنے میں ریاستی حکومت ناکام ثابت ہوئی ہے'۔

کھرگے نے کورونا وائرس وبأ کے دوران میڈیکل اشیا کی خریداری میں مبینہ بدعنوانی کا الزام لگاتے ہوئے کہا کہ 'کورونا وائرس کی روک تھام کے لیے خریدی گئی میڈیکل اشیا میں ریاستی حکومت نے کروڑوں کی بد عنوانی کی ہے جس کی عدالتی جانچ کی جانی چاہیے'۔