برازیلین صدر کی بھارت آمد سے کسان ناراض

ملک میں برازیل کے صدر بولسونارو کی آمد پر ریاست کرناٹک کے ضلع گلبرگہ میں پرانت کسان سنگھ کی جانب سے سخت احتجاج کیا گیا۔

واضح رہے کہ 26 جنوری کو یوم جمہوریہ کے موقع منعقد ہونے والی تقریب میں برازیل کے صدر بولسونارو بھارت کے خاص مہمان ہیں۔

گلبرگہ شہر کے ضلع کمشنر دفتر کے سامنے 26جنوری کی تقریب میں برازیل کے صدر بولسونارو کی آمد پر واپس جاؤ واپس جاؤ کے نعرے لگاتے ہوئے احتجاج کیا گیا۔

اس موقع پر کرناٹک پرانت کسان سنگھ کے نائب ریاستی صدر ماروتی مانپڑےنے کہا کہ برازیل کے صدر بولسونارو ملک کے کسانوں کے مفاد میں نہیں ہیں۔

کیونکہ وہ برازیل کی تیار شدہ شکر کو بھارت میں درآمد کرنا چاہتے ہیں جس سے بھارت کے گنا کسانوں اور شوگر ملوں کو کافی نقصان اٹھانا پڑسکتا ہے۔

انھوں نے مزید کہا کہ وزیر اعظم نریندر مودی نے انھیں 26 جنوری کی تقریب میں مدعو کرکے کسانوں کے دلوں کو چوٹ پہنچانے کا کام کیا ہے۔