ضمیر احمد خان کے یہاں چھاپے ماری سیاسی انتقام: سدارامیا

کانگریس کے سینئر لیڈر اور سابق وزیر اعلیٰ سدارامیا اور ڈی کے شیوکمار نے ضمیر احمد کے رہائش گاہ اور دیگر مقامات پر چھاپے ماری کی مذمت کرتے ہوئے کہا کہ یہ اقدام سیاسی انتقام ہے۔

کرناٹک کے سابق وزیر اعلیٰ اور کرناٹک اسمبلی میں قائد حزب اختلاف سدارامیا نے جمعرات کو ایم ایل اے ضمیر احمد پر ای ڈی کے چھاپوں پر مرکز میں نریندر مودی کی قیادت والی بی جے پی حکومت پر تنقید کی۔

سابق وزیر اعلیٰ سدارامیا

سدارامیا نے اینفورسمینٹ ڈائریکٹریٹ کی جانب سے کیے گئے چھاپوں کے متعلق رد عمل کا اظہار کرتے ہوئے کہا کہ 'یہ چھاپے سیاسی حربہ ہیں جو بی جے پی اپنے مخالفین کو دبانے کے لیے استعمال کر رہی ہے۔ انہوں نے مزید کہا کہ وزیر اعظم مودی کے اقتدار والی حکومت سیاسی انتقام کے لیے اپنی طاقت کا غلط استعمال کر رہی ہے۔

کانگریس رہنما ڈی کے شیوکمار

اس سے قبل کے پی سی سی کے صدر ڈی کے شیوکمار نے بھی چھاپوں کی مذمت کی اور مزید کہا کہ یہ ضمیر احمد کو ہراساں کرنے کی کوشش تھی۔

شیوکمار نے یہ بھی سوال کیا تھا کہ بی جے پی لیڈروں پر چھاپے کیوں نہیں مارے جا رہے ہیں اور صرف کانگریس رہنماؤں کو ہی کیوں نشانہ بنایا جارہا ہے۔