عام انتخابات کے لیے کانگریس اور جے ڈی ایس میں اتحاد

کرناٹک میں کانگریس اور جنتا دل ( سکیولر) کے درمیان لوک سبھا سیٹوں کے لیے سمجھوتہ ہوگیا جس کے تحت کانگریس 20 اور جنتا دل (ایس) آٹھ سیٹوں پر الیکشن لڑے گا۔

کانگریس جنرل سکریٹری اور پارٹی کے کرناٹک کے انچارج کے سی وینو گوپال نے یہاں جاری ہونے والی ریلیز میں بتایا کہ کانگریس صدر راہل گاندھی اور جے ڈی ایس کے رہنما ایچ ڈی دیوگوڑا کے درمیان نئی دہلی میں میٹنگ ہوئی تھی جس میں کانگریس کی طرف سے ان کو اور جے ڈی ایس کی جانب سے دانش علی کو سیٹوں کی تقسیم پر آخری فیصلہ کرنے کے لئے اختیار دیا گیا تھا۔

انہوں نے کہا کہ دونوں پارٹیوں کے رہنماؤں نے مسٹر راہل گاندھی کی موجودگی میں سیٹوں کی تقسیم کو منظوری دے دی۔ ریاست میں لوک سبھا کی کل 28 سیٹیں ہیں۔

کرناٹک میں کانگریس اور جے ڈی ایس کی مخلوط حکومت ہے۔