گلبرگہ: وزیر اعلیٰ بی ایس یدورپا کے ہاتھوں ہائی ٹیک ویجیٹیبل مارکیٹ کا سنگِ بنیاد

ریاست کرناٹک کے شہر گلبرگہ میں وزیر اعلیٰ بی ایس یدورپا کے ہاتھوں ہائی ٹیک ویجٹیبل مارکیٹ کا سنگِ بنیاد، پی ڈبلیوڈی بھون اورسی ایس آئی اسپتال شاہ آباد کی جدید کاری کا سنگِ بنیاد عمل میں آیا۔

ریاست کرناٹک کے شہر گلبرگہ کا وزیر اعلیٰ بی ایس یدورپا نے دورہ کیا۔ اپنے اس دورہ کے دوران وزیر اعلیٰ نے 26 کروڑ 30 لاکھ روپیوں کے صرفہ سے ایم ایس کے ملز میں تعمیر کی جانے والی ہائی ٹیک ویجٹیبل مارکیٹ کا سنگ بنیاد، 47 کروڑ روپیوں کے صرفہ سے تعمیر کردہ پی ڈبلیو ڈی بھون کا افتتاح، سی ایس آئی اسپتال شاہ آباد کا سنگ بنیاد اور گلبرگہ یادگیر ضلع کے 1437 دیہات کے تقریباً 10 ہزار کسانوں میں 50 کروڑ کے زرعی قرضوں کے چیکس تقسیم کیے۔

اس موقع پر وزیر اعلیٰ نے کہا ریاستی حکومت کسانوں کی ترقی کے لئے ہر طرح کی سہولت فراہم کررہی ہے۔ انہوں نے مزید کہا کہ کسان اس ملک کا انا داتا ہیں۔

انہوں نے کسانوں سے اپیل کی کہ وہ حالات سے دلبرداشتہ ہوکر خودکشی کے راستہ کو نہ اپنائیں۔ کسانوں کو بنا سود کے زرعی قرضہ دیا جارہا ہے۔ یہ کسانوں کو زرعی شعبے میں ترقی کرنے کے مقصد سے دیا جارہا ہے. کسان اس قرضے کا صحیح استعمال کریں۔