بنگلورو: ریاست کرناٹک کے دارالحکومت بنگلورو میں واقع مسجد منہاج کے ماتحت چلنے والے مدرسہ منہاج میں 24 بچوں نے قرآن کریم کا حفظ مکمل کیا۔ اس موقعے پر ادارے کی جانب سے ایک اجلاس کا اہتمام کیا گیا جس میں کرناٹک وقف بورڈ کے چیئرمین شافی سعدی و مفتی افتخار قاسمی نے مہمانان خصوصی کے طور پر شرکت کی۔ پروگرام میں حفظ مکمل کرنے والے حفاظ کرام کی دستار بندی کی گئی و انہیں تہنیت ہیش کی گئی۔
اس موقعے پر کرناٹک وقف بورڈ کے چیئرمین شافی سعد نے مسجد میں مکتب کی ضرورت کی اہمیت بتائی اور ریاست بھر کی مساجد کمیٹیوں سے اپیل کی کہ وہ اپنی مساجد میں مکاتب کے چلانے کا اہتمام کریں۔ شافی سعدی نے جنوبی ریاست کیرالہ کی مثال دے کر کہا کہ کیرلہ میں ہر مسجد کے ساتھ ایک مکتب ہوتا ہے جہاں محلے کے بچے دینی علوم سے آراستہ ہوتے ہیں اور ہر بڑی مسجد کے ساتھ مکتب کے علاوہ عصری اسکول و کالج کا قیام کیا جاتا یے جس کی وجہ سے وہاں پر تعلیمی اعتبار سے ریاست سب سے آگے نظر آرہی ہے۔ انہوں نے مسجد و مدرسہ منہاج انتظامیہ کمیٹی کی تعلیمی میدان میں کی جارہی کوششوں کے لئے سراہا۔
ان کا کہنا ہے کہ ملت اسلامیہ کی کسی بھی اعتبار سے ہوئی پسماندگی کی اصل وجہ تعلیم سے دوری ہے اور اسے دور کرنے کے لیے ہر فکرمند شخص اپنا رول نبھانے کی کوشش کرے اور ملت کے نونہال بچوں کو دینی و دنیوی تعلیم سے آراستہ کرے تاکہ بھارت میں بسنے والے مسلمان بہبودی کی طرف بڑھ سکیں۔ مسجد منہاج کمٹی کے صدر نیاز احمد شریف نے کہا کہ مدرسے میں ذیر تعلیم حفاظ کو کمپیوٹر سبجیکٹس کی تربیت سے بھی آراستہ کیا جارہا ہے، تاکہ وہ تعلیم سے فراغت کے بعد روزگار سے جڑ سکیں۔ مولانا مفتی افتخار قاسمی نے کہا کہ جب حافظ قرآن کوئی پروفیشن اختیار کرے تو قرآن مقدس کی برکتوں کی وجہ سے اس میدان میں اس کا کوئی ثانی نہ ہوگا.