درجنوں افراد پر مشتمل زائرین کا پہلا قافلہ کرگل پہنچا

ایران سے واپس آئے کرگل کے زائرین جو کہ ملک کی مختلف ریاستوں - غازی آباد ،جودھ پور، جیسلمیر وغیرہ - میں قرنطینہ میں تھے منگل کو کرگل پہنچے۔

مرکز کے زیر انتظام لداخ کے کئی افراد مقدس مقامات کی زیارت کے لیے ایران گئے تھے تاہم کوروناوائرس کے پیش نظر کئی دنوں تک تہران میں درماندہ رہنے کے بعد انہیں خصوصی طیاروں کے ذریعے ہندوستان لایا گیا جہاں انکی طبی جانچ کے علاوہ انہیں قرنطینہ میں رکھا گیا۔

ان میں سے 57 افراد پر مشتمل پہلا قافلہ قرنطینہ کی مدت مکمل کرنے کے بعد اے این 32کورئیر سروس کے ذریعہ کرگل پہنچایا گیا۔

اس دوران کرگل ہوائی اڈہ پر لینڈ کرنے کے بعد تمام زائرین کا طبی معائنہ کرنے کے بعد ڈاکٹروں نے انہیں احتیاطی تدابیر برتنے کی ہدایات دیتے ہوئے مزید قرنطینہ میں رہنے کی صلاح دی۔

اس دوران چیف ایگزیکٹو کونسلر کرگل نے زائرین کی واپسی پر وزیرات داخلہ اور لیفٹیننٹ گورنر لداخ کا شکریہ ادا کیا۔

انہوں نے مزید کہا کہ باقی درماندہ زائرین کو بھی مرحلہ وار طریقے سے واپس لایا جائے گا۔