جموں میں میوزیکل ایوننگ کے عنوان سے پروگرام

جموں یونیورسٹی کے گیان چند جین ہال میں جمعرات کے روز 'میوزیکل ایوننگ' کے عنوان سے ایک پروگرام کا اہتمام کیا گیا۔

یہ پروگرام جموں و کشمیر اکیڈمی آف آرٹ کلچر اینڈ لینگویجس نے جموں یونیورسٹی کے شعبہ اردو کے اشتراک سے کیا۔

تفصیلات کے مطابق اس پروگرام میں معروف گلوکاروں جن میں کابل بخاری، سید طارق پردیسی، مسرت ناز شامل ہیں، نے اپنے اپنے فن کا مظاہرہ کیا۔ اس میوزیکل ایونٹ میں متعدد طلبا، یونیورسٹی کے عملے اور سول سوسائٹی کے ممبروں کی ایک بڑی تعداد نے شرکت کی۔

موسیقی کے چاہنے والوں نے اکیڈمی اور جموں یونیورسٹی کا شکریہ ادا کیا اور کہا کہ اس طرح کے پروگرامز منعقد کرنے سے یہاں کے نوجوانوں کی صلاحتیں نکھارنے میں مدد مل سکتی ہے۔

اس موقع پر جموں و کشمیر اکیڈمی آف آرٹ کلچر اینڈ لینگویجس کے سکریٹری منیر الاسلام نے خطاب کرتے ہوئے کہا کہ اکیڈمی کی کوشش ہے کہ اس طرح کے ثقافتی ایونٹس میں مقامی نوجوان اپنی صلاحتوں کا مظاہرہ کر سکتے ہیں۔

منیر الاسلام نے کہا کہ اکیڈمی کی جانب سے مستقبل میں بھی اس طرح کی تقاریب کا انعقاد کیا جائے گا۔

انہوں نے مزید کہا کہ یہ بہت اچھی بات ہوگی کہ اگر یونیورسٹی کے باہر کے طلبا بھی اس طرح کے پروگراموں میں حصہ لیں۔