جموں: عارضی ملازمین کا ہڑتال کا اعلان

پی ایچ ای ایمپلائز یونائیٹڈ فرنٹ نے ایک بار پھر حکومت سے محکمے کے عارضی ملازموں کی نوکریوں کی مستقلی، تنخواہوں کی واگذاری اور دیگر مطالبات کو پورا کرنے کا مطالبہ کیا ہے۔

پی ایچ ای ایمپلائز یونائیٹڈ فرنٹ کے ایک عہدیدار نے ہفتے کے روز میڈیا کو بتایا کہ فرنٹ کے کارکنان اپنے مطالبات کے حق میں 22 فروری کو یک روزہ ہڑتال کریں گے۔

انہوں نے کہا کہ محکمہ پی ایچ ای کے ملازموں کا میونسپل کارپوریشن میں ضم کرنے سے متعلق سرکاری حکمنامہکے زیادہ خلاف نہیں ہیں لیکن ہم یہ جاننا چاہتے ہیں کہ التوا میں پڑی ہماریتنخواہوں کا کیا ہوگا۔

انہوں نے کہا کہ ہماررے عارضی ملازمین کا کیا ہوگا جو بیس بیس برسوں سے محکمہ کی خدمت کر رہے ہیں۔

موصوف نے کہا کہ ہم کسی بھی دوسرے محکمہ میں جانے کے لئے تیار ہیں لیکن پہلے ہمارے ان دو اہم مطالبوں کا پورا کیا جانا چاہئے۔

انہوں نے کہا کہ ہمارے ساتھ ایک کیھل کھیلا جا رہا ہے جس کو بند کیا جانا چاہئے۔

ان کا کہنا تھا کہ ہم 22 فروری کو یک روزہ ہڑتال کریں گے اور اس کے بعد آگے کی حکمت عملی طے کریں گے۔